Michel: Sanksionimi i gazit dhe naftës ruse duhet të ndodhë herët a vonë

Shefi i Këshillit Evropian, Charles Michel tha se Bashkimi Evropian duhet të vendosë sanksione në energjinë ruse, siç është nafta dhe gazi, “herët a vonë”, teksa blloku po përgatitet të rrisë presionin ndaj Moskës, pas raportimeve për mizori të luftës të kryera në Ukrainë nga trupat ruse.

“Mendoj se masat mbi naftën dhe edhe gazin do të duhet të ndërmerren herët a vonë”, tha Michel para Parlamentit Evropian.

Ai u bëri thirrje ligjvënësve evropian që të shqyrtojnë sanksione të tilla, që do të shënjestronin burimin kyç të të ardhurave të Moskës, pas raportimeve se “krime të luftës” janë kryer nga trupat ruse në qytetin ukrainas, Butcha ku “që dëshmon se brutaliteti rus kundër popullit të Ukrainës nuk ka kufi”.

Lexo po ashtu Çfarë sanksionesh ekonomike janë ende të mundshme për Rusinë?

Që prej se trupat ruse u tërhoqën javën e kaluar nga qytetet dhe fshatrat përreth Kievit, videot e publikuara dhe mediet kanë raportuar se në këto zona janë parë civilë të vrarë nga trupat ruse, të shtrirë nëpër rrugë. Disa prej viktimave kanë pasur duart e lidhura pas shpine.

Raportimet, që Rusia i quan “të rreme”, kanë nxitur dënim të Rusisë nga komuniteti ndërkombëtar. /REL/