Memedi – Zhbogar: Të jepet kontribut maksimal për tejkalimin e krizës

Përmes një kumtese dërguar Telegrafit Maqedoni, RDK-ja njofton se krryetari i saj, Vesel Memedi, takoi ambasadorin e BE-së në Shkup, Samuel Zhbogar.

Në këtë rast, kryetari i RDK-së theksoi se ”angazhimi i BE-së dhe SHBA-së e shton edhe më shumë përgjegjësinë e çdo subjekti politik në vend që të jenë edhe më konstruktiv në këto momente delikate për zhvillimin e vendit në përgjithësi.”

Sipas tij ”vendi dhe rajoni kanë nevojë për ndihmën e BE-së dhe SHBA-së, që së bashku të përballemi me projektet e rrymave të ndryshme të errëta që për herë të fundit tentojnë të rishfaqen në vend dhe rajon për të krijuar obstrukcione të natyrave të ndryshme. Kryetari Memedi theksoi se vendit i duhet një qeveri progresive dhe reformatore, sa më shpejtë që është e mundshme, dhe për këtë arsye të gjith subjektet politike në vend duhet të japin maksimumin në këtë drejtim.”

Ambasadori i BE-së, Zhbogar, theksoi se ”secili organizim politik dhe shoqëror duhet të jep kontributin maksimal në tejkalimin e problemeve dhe zhvillimin e vendit në përgjithësi, dhe jo të presin që dikush tjetër të merret me detyrat e shtëpisë që duhet kryer nga aktorët vendas. Bashkimi Evropian është mjaft i interesuar për një Maqedoni të sigurtë dhe stabile dhe në këtë drejtim ishte edhe vizita e zonjës Mogherini javën e kaluar, shtoi nëmes tjerash ambasadori Zhbogar./Telegrafi/