Kosova pranohet në FIA

Nga shtetet pjesëmarrëse, vetëm Sllovakia, Serbia dhe Bosnje e Hercegovina kanë abstenuar, ndërsa përfaqësuesit e vendeve tjera kanë qenë për pranimin e FASK-ut në FIA CEZ. Kryetari i FASK-ut, Ismet Rexhepi, është shprehur i kënaqur me atë që ndodhi në Tiranë, megjithëse diçka e tillë edhe është pritur.

“Kemi qenë të bindur se nuk do të ketë asnjë problem, madje ky ka qenë vetëm një formalitet që duhej të kryhet. Sllovakia, Serbia dhe Bosnje e Hercegovina kanë abstenuar në votim dhe kjo kryekëput për shkak të qëndrimeve politike të këtyre vendeve, por është me rëndësi që edhe ata janë shprehur shumë të hapur për bashkëpunim”, ka thënë Rexhepi.

Në këtë zonën e FIA CEZ përfshihen: Shqipëria, Austria, Bosnje e Hercegovina, Kroacia, Çekia, Hungaria, Italia, Maqedonia, Mali i Zi, Polonia, Serbia, Sllovenia dhe Sllovakia, ndërsa që nga 8 prilli pjesë e saj është edhe Kosova.

“Tashmë edhe formalisht nuk ka asnjë barrierë për garuesit tanë për të marrë pjesë në garat ndërkombëtare. Ata janë plotësisht të barabartë me garuesit e vendeve tjera, ndërsa jam i bindur se do t’u gëzohemi edhe rezultateve të mira”, ka shtuar numri një i FASK-ut.

Bazuar në atë që u tregua në edicionin e kaluar si dhe përgatitjet që janë bërë për kampionatin e ri, është më se e qartë se rezultatet nuk do të mungojnë, ndërkohë që është e qartë se numri i garuesve do të jetë edhe më i madh. Kampionati i sivjetmë fillon më 24 prill, me garën që do të zhvillohet në Gjakovë.