Kosova dominon ndaj Gjeorgjisë, por ndëshkohet nga dy gabime

Kosova ka pësuar humbje nga Gjeorgjia (2-1) në stadiumin “Fadil Vokrri”, në një ndeshje që e dominoi por u ndëshkua nga dy gabime.

Vendasit e nisën për mrekulli takimin në përpjekje për ta gjetur golin, ndërsa rastin më të mirë e pati Milot Rashica, goditjen e të cilit e ndali portieri kundërshtar.

Por, një gabim të Aro Muriq, i cili nuk e kapi si duhet topin, duke lejuar futbollistin Tornike Okriashvili t’i kalonte mysafirët në epërsi (11’).

Me gjithë dëshirën për t’i barazuar shifrat, Dardanët nuk arrinin të ndërtonin reaksione të rrezikshme në zonën kundërshtare. Në anën tjetër, gjeorgjianët vazhdonin të insistonin, njëherësh duke ua ndërprerë vendasve aksionet.

Lexo po ashtu Kosova 1-2 Gjeorgjia, të gjitha detajet e ndeshjes

Porse në minutat mbyllëse të fraksionit të parë, një harkim fantastik të Bersant Celinës e shfrytëzoi Elbasan Rashani për të goditur, mirëpo një lojtar i Gjeorgjisë e ndali, sipas VAR-it, pa e kaluar vijën finale.

Në anën tjetër, Milot Rashica u ndal në mënyrë të palejuar në zonë dhe gjyqtari akordoi penallti pas konsultimit të VAR-it. Vedat Muriqi e mori përgjegjësinë dhe u tregua i saktë nga pika e bardhë (45’).

Kosova e dominoi pjesën e dytë të takimit me raste të njëpasnjëshme, të cilat nuk patën konkretizimin e duhur për ta shënuar golin e epërsisë, kurse në anën tjetër pranoi gol.

Një tjetër dalje e rrallë e mysafirëve përpara e kombinuar me reagimin jo të duhur të nikoqirëve u ndëshkua nga Zuriko Davitashvili (82’).

Kosova mbetet në kuotën e katër pikëve në Grupin B, aq sa ka Gjeorgjia që tash e ka zhvendosur skuadrën tonë në vend të fundit në renditje. /Telegrafi/

pic.twitter.com/v7zHmgYM9l

— News video (@Newsvideo13) October 12, 2021