Kështu duket shtëpia e shkatërruar e ish-liderit palestinez Jaser Arafat në Gaza, e bombarduar nga Izraeli

Në Rripin e Gazës, të cilin Izraeli e bombardon prej më shumë se 4 muajsh, u shkatërrua edhe shtëpia e Jaser Arafatit, një nga figurat simbolike të rezistencës palestineze.

Pasi ushtria izraelite u tërhoq pjesërisht nga pikat në perëndim të qytetit të Gazës, në rajon u shfaqën skena të ngjashme me një fatkeqësi natyrore.

Ekipi i Anadolu Agency ka filmuar shkatërrimin dhe dëmin në shtëpinë e Jaser Arafatit, ku ai jetoi 6 vite midis viteve 1995 dhe 2001 e cila është plot kujtime dhe është një nga strukturat e rëndësishme për sa i përket trashëgimisë kulturore në Gaza.

Lexo po ashtu Fotografia që preku shumë njerëz: Një nënë e vrarë nga Izraeli dhe “lamtumira e fundit” me djalin e saj

Dyert dhe dritaret e shtëpisë janë thyer

Fotografitë e Arafatit mbetën të varura në rrënojat e shtëpisë, e cila është nën kujdesin e Fondit të Investimeve të Palestinës dhe u kthye në një grumbull betoni pas bombardimeve izraelite.

Dyert dhe dritaret e shtëpisë u shkatërruan plotësisht, dollapi me rrobat e Arafatit, përfshirë një uniformë ushtarake, një komplet gjumi i përbërë nga mobilie të thjeshta dhe dhoma e gjumit me një foto të fëmijërisë së vajzës së tij Zehva Arafat të varur në mur u shkatërruan plotësisht.

Gjatë sulmit izraelit, perdet në dhomën e gjumit ishin djegur ndërsa xhamat u thyen dhe një kolonë betoni ra në shtratin e Arafatit.

Po ashtu u shemb edhe tavani i dhomës së përdorur nga Suha, gruaja e Arafatit, ku kishte një tavolinë druri.

Anadolu filmon shtëpinë e shkatërruar të ish-liderit palestinez Jaser Arafat në Gaza, e bombarduar nga Izraeli https://t.co/RlVrnZflVn pic.twitter.com/uRz15Eqplz

— Anadolu Shqip (@aa_albanian) February 23, 2024

Kjo dhomë përmbante dokumente zyrtare që i përkisnin ish-udhëheqësit palestinez dhe gruas së tij si dhe një kopje të Çmimit Nobel për Paqen që Arafati e mori në vitin 1994.

U dogjën medaljet e Arafatit

Si pasojë e bombardimeve izraelite, mobiliet në dhomën e ndenjës së shtëpisë u shkatërruan dhe dhoma u mbulua plotësisht me pluhur dhe hi.

Dhjetëra medalje, pllaka dhe sende të ndryshme personale me rëndësi simbolike që Arafati ka marrë në periudha të ndryshme janë të shpërndara përreth dhe shumica e tyre janë djegur si pasojë e bombardimeve.

Shumica e sendeve personale të përdorura nga Jaser Arafati janë ekspozuar në muzeun Mukataa në Ramallah, por ai gjithashtu kishte shumë sende personale të stolisura me kujtimet në shtëpinë e tij në Gaza.

Lexo po ashtu Cilat vende kanë ndaluar furnizimin me armë për Izraelin?

Presidenti i parë i Palestinës, Arafati, i cili konsiderohej si një nga simbolet më të rëndësishme të rezistencës palestineze ndërroi jetë më 11 nëntor të vitit 2004 në Francë.

Ushtria izraelite nisi sulme tokësore në qytetin e Gazës dhe shumë rajone dhe lagje në veri më 27 tetor 2023.

Dje u njoftua se ushtria izraelite, e cila filloi të tërhiqej gradualisht nga rajonet në veri të qytetit të Gazës që nga dhjetori 2023 dhe pjesërisht u tërhoq nga lagjet dhe rajonet në qytetin e Gazës në fillim të janarit, u tërhoq edhe nga disa rajone në veri të Rripit të Gazës dhe në veriperëndim të qytetit të Gazës, ku është vendosur që nga 27 tetori 2023.

Në sulmet e Izraelit në Rripin e Gazës që nga 7 tetori, 29.514 palestinezë, përfshirë të paktën 12.660 fëmijë dhe 8.570 gra, u vranë dhe 69.616 persona u plagosën.

Ndërsa raportohet se ka ende mijëra të vdekur nën rrënoja, infrastruktura civile po shkatërrohet gjithashtu duke synuar spitalet dhe institucionet arsimore ku njerëzit ishin strehuar. /AA/