John Bolton, këshilltari i presidentit të SHBA-ve, Donald Trump pritet ta vizitojë rajonin në fund të këtij muaji.

Siç shkruan gazeta serbe “Blic”, Bolton pritet të qëndrojnë në Prishtinë e Beograd në fund të gushtit më së largu në fillim të shtatorit, transmeton Telegrafi.

Sipas gazetës thuhet se SHBA-të, do të nisin një ofensivë kur bëhet fjalë për zgjidhjen e problemit me Kosovën, duke rifilluar dialogun.

Se a do të vijë deri tek kjo vizitë e nivelit të lartë sipas “Blic” duke cituar burimet diplomatike, thuhet se kjo varet nëse Prishtina do ta heqë taksën 100 për qind për mallrat serbe.

“Nëse ka një garanci që taksa do të hiqet, ai do të vijë. Përndryshe, vizita e tij nuk do të ndodhë, sepse ai thjesht nuk dëshiron të jetë i pasuksesshëm. Meqenëse situata me taksën nuk është e sigurt tani për tani, vizita nuk është konfirmuar”, i ka thënë ky burim të përditshmes serbe.

Gazeta serbe gjithashtu shkruan se “Bolton, në deklaratën e tij se Amerika nuk përjashton korrigjimet territoriale, e vendosi historinë e demarkacionit një vit më parë si një zgjidhje të mundshme për nyjën e Kosovës, por gjithashtu shënoi praktikisht ndryshimin e politikës së Washingtonit drejt ndryshimit të kufijve në Ballkan”. /Telegrafi/