Kanye West ka arritur t’i emocionojë disa nga të burgosurit në burgun famëkeq të Teksasit, Harris County. Rreth 200 të dënuar e kanë pasur mundësinë që ta takojnë nga afër reperin amerikan, i cili i ka interpretuar këngët e reja para tyre.

“Jesus Is King” është realizimi më i ri i 42-vjeçarit, ndërsa pikërisht këngët e këtij albumi, ai i ka performuar para të burgosurve.

Sky News shkruan se West e ka shfrytëzuar një tunel të fshehtë për të arritur në koncertin e tij para të burgosurve.

Sipas sherifit të qarkut Harris, Ed Gonzalez, shumë yje të muzikës kanë kërkuar të interpretojnë në burg, duke ndjekur shembullin e këngëtarit të muzikës ‘country’, Johnny Cash, i cili ka mbajtur koncerte të tilla në Kaliforni.

Cash kishte performuar dy herë në burgun shtetëror, Folsom, në vitin 1968, ndërsa më pas 17 këngë nga ato koncerte ishin përmbledhur në albumin “At Folsom Prison”. /Telegrafi/