Imazhet e reja satelitore, tregojnë shkatërrimin masiv në Severodonetsk dhe Rubizhne në lindje të Ukrainës

Pjesë të qyteteve ukrainase Rubizhne dhe Severdonetsk janë shkatërruar në masë të madhe, e këtë e dëshmojnë edhe imazhet e reja satelitore të kompanisë amerikane Maxar Technologies.

Bombardimet e granatimet e vazhdueshme mes forcave ukrainase dhe atyre ruse – kanë bërë që pjesë të këtyre dy qyteteve të shkatërrohen plotësisht. E ajo çfarë i shkatërroi më së shumti ishte pikërisht artileria ruse, transmeton Telegrafi.

E pavarësisht se lagje të tëra janë bërë rrafsh me tokë, kjo nuk po i mjafton ushtrisë së Vladimir Putinit, që po vazhdon të bombardon në dy qytetet e rajonit të Donbasit.

Lexo po ashtu Kufomat e luftëtarëve ukrainas që u vranë duke mbrojtur Mariupolin nga rusët, kthehen në Kiev

Imazhet satelitore tregojnë se dhjetëra ndërtesa në veri të Severodonetskut, janë shkatërruar nga sulmet ushtarake.

Ndërkaq zonat e gjelbëruara janë bërë me gropa nga predhat e shumta që kanë rënë.

Madje dy spitale janë shkatërruar plotësisht – duke krijuar kratere (mbi 40 metra të gjera), si pasojë e bombave gjigante ruse që kanë rënë mbi to. /Telegrafi/