Gërvalla: Do të bisedoj me ambasadorin Berishaj, s’kam arsye të besoj në pretendimet kundër tij

Ministrja e Punëve të Jashtme dhe Diasporës, Donika Gërvalla, ka deklaruar të premten se nuk ka arsye të besojë në pretendimet e një medium slloven kundër ambasadorit të Kosovës në Kroaci, Martin Berishaj, i cili po akuzohet për përfshirje në një skandal financiar.

Në një linjë direkte nga Nju Yorku për emisionin “Five” në RTV Dukagjinin, Gërvalla ka thënë se i ka ndjekur raportimet dhe se shumë shpejtë do të komunikojë me Berishajn. Megjithatë, sipas saj, në këtë fazë nuk ka arsye që të ndërmerren hapa.

“Bëhet fjalë për një raportim nga një medium slloven në kohë fushate. I kam lexuar dhe përcjellur me kujdes raportimet. Brenda një periudhe të shkurtë do të bisedoj edhe personalisht me ambasadorin Berishaj, i cili shumë qartë dhe publikisht ka treguar që nuk ka asgjë të vërtetë në ato raportime të mediave”.

Lexo po ashtu U raportua për përfshirjen e ambasadorit në skandal financiar, presidentja Osmani kërkon raport nga Berishaj - Qeveria kërkon kujdes ndaj pretendimeve

“Por, unë nuk kam asnjë arsye të besoj se këto pretendime mund të dalin të sakta përderisa ambasadori thotë që nuk janë. Është çështje e organeve të drejtësisë të cilave ju është drejtuar Berishaj”, është shprehur kryediplomatja Gërvalla.

Mes tjerash, ajo ka thënë se do të ndjekin me shumë kujdes të gjitha zhvillimet dhe se do të ndërmarrin hapat atëherë kur ato të jenë të nevojshme./Telegrafi/