Gërvalla: Kica-Xhelili i ndërroi qëndrimet e saj për reformën në drejtësi

Bashkëkryetarja e Partisë Guxo, Donika Gërvalla-Schwarz, ka thënë se deputetja Doarsa Kica-Xhelili e cila u largua nga kjo parti për t’iu bashkuar LDK-së i ka ndryshuar qëndrimet e saj për reformën në drejtësi.

“Të largohesh nga ky koalicion dhe të shkosh në një parti politike e cila që 20 vjet është e pranishme në pushtet dhe që reformën për drejtësi në një vit e gjysmë ky koalicion ka ndërmarrë shumë më tepër hapa drejt reformës në drejtësi, edhe drejt konkretizimit”, tha Gërvalla për Klan Kosova.

“Bashkëpartiakja i ka ndërruar qëndrimet e saj rreth refomës në drejtësi, sepse përndryshe nuk do të ishte e mundur të shkonte në një parti e cila përtej fjalëve boshe rreth drejtësisë gjatë më shumë se 20 vjetëve, ku ka qenë pjesë e pushtetit, nuk ka dëshmuar”, tha ajo.

Gërvalla-Schwarz nuk komentoi më shumë për motivet e largimit të ish-bashkëpartiakes së saj, por tregoi bisedën e fundit me të për reformën në drejtësi për të cilën Kica-Xhelili tha se ishte arsyeja kryesore e largimit të saj.

“Deputetja Kica-Xhelili nuk e di çfarë ka biseduar me kryeministrin apo me kryetarin e Vetëvendosjes, sepse unë nuk kam qenë e pranishme në ato biseda qëe mund t’i ketë zhvilluar ajo me të. Unë e di çfarë ka biseduar deputetja Kica-Xhelili në grupin tonë parlamentar dhe çfarë ka biseduar me mua si drejtuese e përkohshme e subjektit politik”.

“Nëse flasim konkretisht për reformën në drejtësi mua më kujtohet një bisedë që e kam zhvilluar me deputeten Kica-Xhelili. Ajo ka pasë dilema rreth momentit kur po votohet në Kuvend ideja e Byrosë, por më ka siguruar që ideja e Byrosë dhe reformat në drejtësi e kanë mbështetjen e saj të plotë. Kjo ka qenë biseda jonë e fundit dhe e para që kemi pasë rreth kësaj reforme”, tha Gërvalla.