Sipas Forbes, këta dhjetë futbollistë dominojnë botën jo vetëm në fushë, por edhe në aspektin financiar.
Me gjashte prej tyre që luajnë në Evropë, ndërsa pjesa tjetër në Lindjen e Mesme dhe SHBA, futbolli modern po përjeton një epokë ku ndikimi ekonomik i lojtarëve është po aq i madh sa ai sportiv.
10. Lamine Yamal – 43 milionë dollarë
Në vendin e dhjetë, dhe si më i riu ndonjëherë në këtë listë, renditet Lamine Yamal, vetëm 18 vjeç, me 43 milionë dollarë fitime totale. Ai përfiton 33 milionë dollarë nga Barcelona dhe 10 milionë jashtë fushës, përmes marrëveshjeve me Beats by Dre, Adidas, dhe linjën e tij të veshjeve “304”. Yamal përfaqëson fytyrën e re të futbollit botëror – talent, marketing dhe ndikim global në moshë shumë të re.
9. Jude Bellingham – 44 milionë dollarë
Në vendin e nëntë renditet Jude Bellingham, 22 vjeç, me fitime prej 44 milionë dollarësh. Ai merr 29 milionë dollarë në fushë nga kontrata me Real Madrid, pas transferimit të tij prej 140 milionë dollarësh, ndërsa 15 milionë dollarë jashtë saj nga Adidas dhe Lucozade. Përveç suksesit sportiv, Bellingham njihet edhe për angazhimin në fushën e shëndetit mendor, duke u bërë një figurë me ndikim për brezat e rinj.
Jude Bellingham telegrafi.com
8. Sadio Mané – 54 milionë dollarë
Sadio Mané, 33 vjeç, renditet i teti me 54 milionë dollarë, prej të cilave 50 milionë dollarë vijnë nga Al Nassr, në vitin e fundit të kontratës së tij. Ai fiton edhe 4 milionë jashtë fushës përmes marrëveshjes me New Balance. Pavarësisht largimit nga Evropa, Mané mbetet një nga lojtarët afrikanë më të paguar në botë.
Sadio Mane telegrafi.com
7. Mohamed Salah – 55 milionë dollarë
Mohamed Salah, 33 vjeç, zë vendin e shtatë me 55 milionë dollarë. Ai përfiton 35 milionë dollarë në fushë dhe 20 milionë jashtë saj, kryesisht nga kontratat reklamuese. Egjiptiani vazhdon të jetë një nga figurat më dominuese te Liverpool, ndërsa synon një tjetër sezon të suksesshëm në Ligën Premier.
Mohamed Salah
6. Vinícius Jr. – 60 milionë dollarë
Vinícius Jr., 25 vjeç, renditet i gjashti me 60 milionë dollarë, duke ndarë fitimet në 40 milionë në fushë dhe 20 milionë jashtë saj me klubin e tij, Real Madrid. Braziliani ka sponsorizime nga Nike, Hugo Boss dhe Prada Eyewear, duke reflektuar ndikimin e tij global si një nga figurat më të dashura në futbollin modern.
Vinicius telegrafi.com
5. Erling Haaland – 80 milionë dollarë
Në vendin e pestë është Erling Haaland, 25 vjeç, me 80 milionë dollarë fitime. Pjesa më e madhe, 60 milionë dollarë, vjen nga kontrata e tij e re me Manchester City, ndërsa 20 milionë të tjera nga marrëveshjet me Nike, Bama Gruppen, Godfisk dhe një investim të ri në kompaninë e bagazheve Db. Haaland po rrit gjithnjë e më shumë ndikimin e tij komercial, ndërsa Man City synon një tjetër titull në Ligën Premier.
Erling Haaland telegrafi.com
4. Kylian Mbappe – 95 milionë dollarë
Kylian Mbappé, 26 vjeç, renditet i katërti me 95 milionë dollarë, nga të cilat 70 milionë vijnë nga kontrata me Real Madrid, pavarësisht eliminimit zhgënjyes në Ligën e Kampionëve sezonin e kaluar. Ylli francez po zgjerohet edhe në biznes, me investime në Loewe, Stade Malherbe Caen, Wristcheck dhe France SailGP Team përmes kompanisë së tij, Coalition Capital.
Kylian Mbappe
3. Karim Benzema – 104 milionë dollarë
Karim Benzema, 37 vjeç, ruan vendin e tretë me 104 milionë dollarë fitime. Ai përfiton 100 milionë dollarë nga kontrata me Al Ittihad, që është në vitin e fundit të saj, dhe 4 milionë dollarë nga marrëveshje me Adidas dhe Assaf Perfumes. Në media po qarkullojnë spekulime për një rikthim të mundshëm në Evropë – ndoshta te Benfica nën drejtimin e Jose Mourinhos – por për momentin, qëndrimi i tij në Lindjen e Mesme e mban ende në mesin e elitës botërore.
Karim Benzema telegrafi.com
2. Lionel Messi – 130 milionë dollarë
Në vendin e dytë renditet Lionel Messi, 38 vjeç, në formë të shkëlqyer te Inter Miami. Ai pritet të përfitojë gjithsej 130 milionë dollarë, ndërsa raportet sugjerojnë se është pranë një rinovimi shumëvjeçar që do ta mbajë në MLS përtej vitit 2026. Tifozët presin mundësinë që Messi të luajë në Kupën e Botës 2026, ndoshta për herë të gjashtë me Argjentinën.
Lionel Messi telegrafi.com
1. Cristiano Ronaldo – 280 milionë dollarë
Në moshën 40-vjeçare, Cristiano Ronaldo ka heshtur të gjitha zërat për pensionim këtë verë duke rinovuar me Al Nassr për një kontratë dyvjeçare. Sipas Forbes, ai pritet të fitojë 230 milionë dollarë nga paga dhe bonuset në fushë gjatë sezonit 2025–26, dhe 50 milionë të tjera jashtë saj nga kontratat me Nike, Binance dhe Herbalife, duke dëshmuar se karriera e tij nuk ka të ndalur.
Cristiano Ronaldo telegrafi.com
/Telegrafi/
