Inter ka arritur fitore edhe në ndeshjen e dytë ndaj Rapidit të Vjenës duke e mposhtur me rezultat të thellë 4-0.

Interi kishte marrë një fitore të rëndësishme në ndeshjen e parë 1-0 nga udhëtimi në Vjenë.

Kësisoj Neroazzurrët ishin më të qetë dhe luajtën më mirë që nga fillimi i ndeshjes.

Vetëm pas 11 minutash lojë Interi arriti ta shënonte golin e parë në këtë takim.

Mbrojtësit austriak nuk e larguan topin mirë që shkoi te Vecino i cili me një gjuajtje të fortë shënoi për 1-0.

Matias Vecino dhe Ivan Perisic. (Foto: Emilio Andreoli/Getty Images/Guliver)

Interi nuk u ndal pasi tetë minuta më vonë e arriti edhe golin e dytë në këtë sfidë.

Ishte qendërmbrojtësi Andrea Ranocchia që me një gjuajtje të fortë jashtë 16 metërshit realizoi për 2-0.

Rapid tentoi ta ngushtoi rezultatin në minutën e 43-të me Andrea Pavlovic, por Handanovic ishte në vend.

Në pjesën e dytë Interi e uli ritmin e ndeshjes duke pasur parasysh se kishte epërsi të lartë përballë Rapidit.

Rasti më i mirë iu dha kroatit Ivan Perisic në minutën e 69-të, por që goditja e tij u ndal nga shtylla.

Lautaro Martinez. (Foto: Emilio Andreoli/Getty Images/Guliver)

Perisic nuk u ndal duke kërkuar golin dhe atë e gjeti 10 minuta para fundit të ndeshjes kur realizoi një gol të bukur pas asistimit nga Candreva.

Për golin e katërt dhe rezultatin përfundimtar në këtë takim u përkujdes italiani Matteo Politano që realizoi tre minuta para fundit të ndeshjes.

Kësisoj Interi pa problem eliminon Rapidin e Vjenës me rezultat të përgjithshëm 5-0 pas 180 minutash lojë.

Neroazzurrët kanë siguruar plasmanin në mesin e 16 skuadrave më të mira në Ligën e Evropës dhe tani janë në pritje të kundërshtarit të radhës. /Telegrafi/