Fansat vendosin lule dhe bëjnë lutje jashtë shtëpisë së Tina Turner në Zvicër

“Dikush si ajo duhet të jetojë përgjithmonë”, tha një nga fqinjët e Tina Turner ndërsa ajo vendosi lule jashtë shtëpisë së legjendës së muzikës në Zvicër të enjten (25 maj).

Barbara Burkhalter ishte në mesin e njerëzve që linin letra dhe mesazhe jashtë vilës së Turnerit në liqenin e Cyrihut, ku mbretëresha e muzikës 83-vjeçare kishte jetuar për gati tre dekada.

Vdekja e Turner të mërkurën (24 maj) shkaktoi homazhe nga liderët botërorë dhe ikonat e tjera të ‘rock’-ut, por edhe nga fqinjët e saj në periferi të Cyrihut, Kuesnacht, ku ylli bënte një jetë të qetë, shkruan DailyMail.

“Unë solla lule dhe një kartë të vogël. Më duhej vërtet të vija”, tha Burkhalter, 69 vjeç.

“Ne nuk e dëgjojmë më zërin tënd, por ai është ende në zemrën time. Ajo ishte e preferuara ime… Na pëlqente që ajo ishte këtu, por nuk do ta kishim shqetësuar kurrë. Pusho e qetë”, u shpreh ajo.

Buqeta të mëdha dhe lule individuale e dashamirësve po vendoseshin pranë portave të kështjellës, së bashku me qirinj, karta dhe mesazhe të shkruara me dorë për yllin e lindur në SHBA.

Përveç vokalit të saj të lartë dhe pranisë magnetike në skenë, tejkalimi i dhunës në familje nga Turner preku shumë në mbarë botën.

Një tjetër fanse, Guia Greaves tha se ajo njihej në vend si një person i sjellshëm dhe një fqinj e mirë, e matur dhe modeste.

“Nuk e di sa herë kalova këtu teksa dëgjoja këngët e saj dhe thashë “Hej, Tina!”, tha Greaves për AFP.

“Dhe vërtet e admiroj atë që ajo simbolizonte për dhunën në familje, mënyrën se si lulëzoi pa urrejtje. Tani kemi thesarin e muzikës së saj dhe duhet të vazhdojmë ta dëgjojmë. Ajo ishte shumë e fortë'”, tha ajo.

Turner u shpërngul në Zvicër në vitin 1995 me partnerin e saj të gjatë Erwin Bach, 67 vjeç. Disa lanë lule drejtuar producentit gjerman.

Territori i vilës ka gardhe të dekoruara në mënyrë të përsosur dhe shkurre të mëdha shumëngjyrëshe në nuanca rozë dhe blu.

Shtëpia e bardhë trekatëshe, e cila mbështetet në liqenin e Cyrihut, është e mbrojtur nga rruga me pemë të larta.

“Muzika e saj u bë pjesë e jetës sime si adoleshente dhe më bëri të mendoj se çfarë bëjmë nga kjo jetë”, tha Bryan Mackie, 29 vjeç.

“E dashura ime është një fanse edhe më e madhe se unë. Ajo është shumë e trishtuar, unë solla lulet për të. Ajo solli pasionin për muzikën”, tha ai.

Një burrë u gjunjëzua dhe dha tre puthje drejt kështjellës, një grua preku me butësi portat pasi vendosi lule, ndërsa një grua tjetër tha lutjet në italisht.

Një grua, e cila e kishte vizituar tashmë gjatë natës, qëndroi në lot para portave.

Andrea Brunetti, 47 vjeç, një punonjës italian i IT që jeton në Lucern, la një trëndafil me një zemër dashurie.

“Ajo është gruaja më e bukur në 200 vitet e fundit. Ajo është me të vërtetë një thesar. Ajo është më shumë se një artiste, ajo është një shpirt i bukur”, tha ai.

“Ajo gjithmonë ka dhënë 110 për qind deri në fund. Disa njerëz nuk do të vdesin kurrë. Faleminderit Tina, për gjithçka që i ke dhënë njerëzve”, u shpreh tutje ai.

Jerika Seiler, 48, e cila e takoi Turnerin shumë herë në restorantet lokale gjatë 20 viteve të fundit, ndezi një qiri.

Dizajnerja e modës tha se një herë teksa po kalonte pranë vilës së saj, Turner “hapi dritaren dhe tha “Përshëndetje!” dhe buzëqeshi. Unë bërtita nga lumturia!”.

“Ajo ishte kaq e fortë. Mesazhi i saj për jetën, do të më mungojë. Ajo ishte e shkëlqyer në çdo aspekt. Ajo do të jetë gjithmonë thjesht më e mira”, tha ajo. /Telegrafi/