Facebook ka shlyer disa faqe të lidhura me “të djathtët aktivë” në Ballkan

Gjiganti i mediave sociale Facebook, ka shlyer një rrjet të faqeve me miliona ndjekës, të lidhur me “Knight Templar Internacional”, një organizatë “militante krishtere” që është aktive në Ballkan.

Facebook ka shlyer të paktën 14 faqe të identifikuara gjatë një bashkëpunimi mes BIRN dhe BBC, që kanë lidhje me “Knights Templar International” ndryshe e njohur si KTI, shkruan balkaninsight, transmeton Telegrafi.

KTI që e quan veten “mburojë dhe shpatë të komuniteteve të krishtera dhe që ruan parimet e krishtera”, ishte mburrur me mënyrën se si rrjeti i gjerë i faqeve në median sociale ndihmoi në zgjedhjen e Donald Trumpit si president i SHBA-së, si dhe lëvizjen e referendumit në Mbretërinë e Bashkuar për të dalë nga Bashkimi Evropian.

Artikujt aktualë në këto faqe përshëndesnin “rënien e numrit të madh të aborteve në Rusi” si dhe referendumin e ardhshëm kundër martesës së homoseksualëve në Rumani.

Kjo organizatë kishte shkaktuar polemika për shkak të pikëpamjes së saj të ashpër për emigracionin e myslimanëve në Evropë, si dhe që serbët e Kosovës po përgatiten për konfrontim me shumicën myslimane të Kosovës.

Lajmi për vendimin e Faceook, fillimisht ishte raportuar nga aktivistët e “Raportit Ndërkombëtar të Bigtoris dhe fashizmit”.

Ata gjithashtu publikuan një letër që me sa duket është shkruar nga KTI, ku bëhej thirrje për fonde për të luftuar Facebook-un, duke e fajësuar për vendimin e marrë.

Në letër thuhej se “20 faqe britanike, amerikane, australiane dhe evropiane”, janë shlyer të premten më 7 shtator, me një total prej 3 milionë pëlqimeve në Facebook.

Megjithatë, BIRN nuk e ka verifikuar në mënyrë të pavarur autenticitetin e korrespondencës.

Sidoqoftë, më 7 shtator, KTI publikoi një deklaratë në faqen e saj në median sociale GAB, në të cilën thuhej se Facebook “ka filluar sërish spastrimin e llogarive djathtiste dhe të krishtera”. Ndërkaq, Facebook dhe KTI nuk u janë përgjigjur kërkesave për komente.

“Knights Templar International” ka marrë emrin sipas rendit mesjetar katolik të kryqëzatave të themeluar në shekullin e 12-të, që ka luajtur rol të rëndësishëm në luftërat e Tokës së Shenjtë kundër myslimanëve. Fillimisht ishte vendosur në Jerusalem, por u detyruan të zhvendosen me seli në Qipro. Megjithatë ajo ishte shpërbërë nga Papa në vitin 1312, kurse shumë anëtarë të saj u ekzekutuan.

Organizata moderne që nuk ka lidhje me Vatikanin, por që ka lidhje me aktivistin skocez që është kundër aborteve James “Jim” Dowson, sipas UK Times është i njohur si “organizatori ekstremist i marketingut”, edhe pse ai mohon të ketë pasur rol zyrtar në këtë organizatë.

Në vitin 2016, Dowson i ishte ndaluar hyrja në Hungari, në qendrën që dikur ishte kyçe për rrjetin e KTI-së. Prej atëherë, ai dhe KTI e kanë shfrytëzuar gjithnjë e më shumë Beogradin për aktivitetet e tyre në media. Në ndërkohë Dowson është duke apeluar vendimin e hungarezëve.

Aktivitetet e KTI-së në Serbi përfshijnë realizimin e videove në kryeqytet, për të ndihmuar në lansimin e ueb-faqeve dhe trajnimin e grupeve djathtiste dhe të aktivistëve, se si duhet fituar “lufta e informacionit”.

Përveç trajnimeve, KTI që Dowson e përshkruan si “militantë të rendit të krishterë”, gjithashtu merret me furnizimin e pajisjeve për vullnetarët që ata e quajnë vijën e parë mes Krishterimit dhe Islamit.

Ajo ka përdorur fondet e veta për të siguruar xhaketa taktike (forca mbrojtëse trupore) dhe pajisje komunikimi për grupet serbe në zonën e paqëndrueshme të veriut të Kosovës dhe për grupet vigjilente që ndalojnë migrantët që të kalojnë kufirin bullgaro-turk.

Ndërsa Dowson nuk iu përgjigj kërkesave të BIRN-it për koment, në një përgjigje ndaj SundyPost, me bazë në Skoci, ai e përshkroi lidhjen mes tij dhe faqeve “lajme të rreme”.

Ndërsa në përgjigjen e vetë, Facebook ka thënë se: “Ne kemi hequr këto faqe pasi ato kanë shkelur standardet tona të komunitetit”. /Telegrafi/