Më e gjata në Evropë, pse ura e Kerçit është e rëndësishme për Rusinë dhe Ukrainën dhe çfarë dihet për shpërthimin?

Një shpërthim vdekjeprurës shkaktoi një zjarr të shtunën dhe shkaktoi dëme masive në urën e Kerçit që lidh Rusinë me Krimenë.

Zyrtarët rusë thanë se zjarri u shkaktua nga një shpërthim kamioni. Analistët kanë sugjeruar se mund të ketë qenë rezultat i një sulmi ukrainas. Ministria ruse e Transportit tha se trafiku i kufizuar rrugor rifilloi në njërën korsi të urës më vonë të shtunën, raporton Deutsche Welle, përcjell Telegrafi.

Siç raportohet, zyrtarët ukrainas nuk e kanë marrë drejtpërdrejt përgjegjësinë për shpërthimin, por kanë bërë rregullisht aludime ndaj dëshirës për të shkatërruar urën dhe kanë bërë postime në mediat sociale duke festuar shpërthimin.

Kievi është zotuar të rimarrë Krimenë, të cilën Rusia e aneksoi ilegalisht në vitin 2014.

Çfarë është Ura e Kerçit?

Moska e ndërtoi urën e Kerçit për të lidhur Gadishullin e Krimesë të sapo aneksuar me rajonin rus të Krasnodar Krai në Kaukazin verior.

Ura kushtonte 3.6 miliardë dollarë në atë kohë. Me një gjatësi prej 19 kilometrash, projekti ambicioz, i projektuar për të ndihmuar në forcimin e infrastrukturës së Krimesë dhe forcimin e lidhjes së saj me Rusinë, është ura më e gjatë në Evropë.

Kievi akuzoi Rusinë për dëmtimin e mjedisit dhe pengimin e kalimit të anijeve më të mëdha në ndërtimin e urës, që kalon Ngushticën e Kerçit që lidh Detin Azov me Detin e Zi.

Ura përfaqëson një burim të madh furnizimesh për forcat ruse në rajonin e okupuar të Khersonit në Ukrainë. Moska aneksoi ilegalisht rajonet jugore Kherson dhe Zaporizhzhia në fund të shtatorit, përmes të cilave synon të lidhë Krimenë me rajonet Donetsk dhe Luhansk, ku separatistët pro-rusë kanë zhvilluar një kryengritje kundër Kievit që nga viti 2014.

Shpërthimi ishte ‘pothuajse me siguri’ një sulm ukrainas

Mike Martin nga Kings College (universitet në Mbretërinë e Bashkuar) tha për Deutsche Welle të shtunën se zjarri në urën e Kerçit ishte “pothuajse me siguri” rezultat i një sulmi ukrainas.

Bashkëpunëtori i Departamentit të Luftës në Kings College tha se gjymtimi i urës ka një rëndësi strategjike dhe simbolike për Ukrainën.

Vetëm dy lidhje hekurudhore lidhin Rusinë me Krimenë dhe rajonin Kherson, u shpreh ai. Ai shtoi se forcat ruse mbështeten shumë në lidhjet hekurudhore për furnizime.

“Një është në urën që sapo e kemi parë të shkatërruar”, theksoi Martin, duke iu referuar linjave të mallrave në urën e Kerçit. “Pra, ukrainasit po izolojnë qartë forcat ruse nga furnizuesit e tyre”.

“Kjo urë e ka emrin e Putinit mbi të”, potencoi Martin, duke shtuar se shpërthimi erdhi në një kohë kur ushtria dhe presidenti i Rusisë përballen me kritika në shtëpi për humbjet në fushën e betejës.

Zyrtarët ukrainas u tallën me Moskën për shpërthimin

Dëmtimi i urës së Kerçit ka një vlerë simbolike të rëndësishme për Kievin, që është zotuar të rimarrë gadishullin e Krimesë nga Rusia, së bashku me të gjithë territorin tjetër ukrainas të pushtuar aktualisht nga forcat ruse.

Kreu i Këshillit të Sigurisë Kombëtare dhe Mbrojtjes së Ukrainës, Oleksiy Danilov, postoi një video në Twitter ku shfaqej Ura e Krimesë e djegur përballë Marilyn Monroe duke kënduar “Gëzuar ditëlindjen, zoti President”. Shpërthimi ndodhi një ditë pas ditëlindjes së 70-të të Putinit.

Доброго ранку, Україно! 🇺🇦 pic.twitter.com/UQMI6LheSR

— Oleksiy Danilov (@OleksiyDanilov) October 8, 2022

Shërbimi postar i Ukrainës tha se do të shtypte një pullë speciale për të përkujtuar shpërthimin.

Pas shpërthimit, këshilltari presidencial ukrainas, Mykhailo Podolyak, shkroi në Twitter se ky ishte “vetëm fillimi”.

“Gjithçka e paligjshme duhet të shkatërrohet, gjithçka që është vjedhur duhet të kthehet në Ukrainë, gjithçka e pushtuar nga Rusia duhet të dëbohet”, tha Podolyak.

Më vonë të shtunën, Podolyak shkroi një postim në Twitter duke sugjeruar se ura ishte dëmtuar për shkak të sabotimit që ndodhi brenda Rusisë. “A nuk është e qartë se kush e bëri shpërthimin? Kamioni mbërriti nga [Federata Ruse]”, tha ai.

Zëdhënësja e Ministrisë së Jashtme ruse, Maria Zakharova, tha se reagimi i zyrtarëve ukrainas ndaj dëmtimit të urës “dëshmon për natyrën terroriste të Kievit”. /Telegrafi/

Përktheu dhe përshtati: Arigona Bytyçi