Ka ndërruar jetë pasditen e sotme hit-këngëtari i njohur rokut pejan e kosovar Eduard Meraku, i njohur si Edi King.

I ndjeri ka vdekur në moshën 65 vjeçare, ndërsa mendohet të ketë pësuar sulm kardiak, shkruan Njëshi.

Lajmi për vdekjen e tij, fillimisht u konfirma nga miq dhe bashkëpunëtorë muzikor të të ndjerit.

Eduard Meraku (Foto: Besnik Hamiti)

Ndërsa, gjatë mbrëmjes, Spitali i Pejës, nëpërmjet ekipit kujdestar të Emergjencës, ka konfirmuar për ‘RADIO 1’, se këngëtari Meraku, tashmë i ndjerë, është referuar dhe dërguar drejt QKUK-së, ku edhe ka ndërruar jetë, pas problemeve kardiake.

Edi King, nesër (e premte) do të përcjellet për në banesën e tij të fundit në varrezat e qytetit të lindjes në Pejë.

Ceremonia mortore, do të zhvillohet në ora 13:00.

Edi King padyshim që do mbetet gjurmë e pashlyer në historinë muzikore. Ai ishte edhe njëri ndër themeluesit e rock-grupit kosovar Seleksioni 039 të njohur për hitet e tyre në vitet e 80-ta dhe 90-ta. /Radio 1/