Futbollisti legjendar skocez dhe ish-trajneri i Liverpoolit, Sir Kenny Dalglish, ka konfirmuar se aktualisht po i nënshtrohet trajtimit për kancer, pasi informacioni u bë publik pa dashje përmes një postimi të tij në rrjetet sociale.

Dalglish lëshoi një deklaratë të shkurtër në të cilën konfirmoi diagnozën, por gjithashtu i inkurajoi tifozët me mesazhin se trajtimi po shkon mirë.

"Siç e ka treguar postimi im i paqëllimshëm në rrjetet sociale, aktualisht po i nënshtrohem trajtimit për kancer. Ndryshe nga përdorimi i një telefoni celular, trajtimi po shkon mirë", deklaroi Dalglish me një dozë humori karakteristik.

Ai shtoi se do të donte që e gjithë situata të kishte mbetur private, por që, siç thotë ai, "aftësitë e tij të padobishme teknologjike" e detyruan të konfirmonte informacionin që tashmë kishte dalë në publik.


Lajmi për gjendjen shëndetësore të njërit prej emrave më të mëdhenj të futbollit në histori shkaktoi reagime të shumta në të gjithë botën e futbollit. Tifozët, ish-shokët e ekipit dhe klubet i dërguan mesazhe mbështetjeje skocezit legjendar.

Gjatë karrierës së tij të pasur, Dalglish la një gjurmë të pashlyeshme në Liverpool, si lojtar dhe si trajner, dhe konsiderohet si një nga ikonat më të mëdha të klubit nga Anfield.

Mesazhi i tij se trajtimi po ecën mirë ngjalli optimizëm te tifozët, të cilët i urojnë shërim të shpejtë dhe të suksesshëm.

Përveç tij, nga e njëjta sëmundje vuan edhe legjenda tjetër e Liverpoolit, Kevin Keegan, i cili zbuloi se vuan nga kanceri në fazën e katërt, dhe informacioni i përmendur u zbulua brenda 24 orëve.

Faza e katërt është faza më e avancuar e kancerit dhe do të thotë që sëmundja është përhapur në pjesë të tjera të trupit. /Telegrafi/

Premier LeagueFutbollNdërkombëtareSportEkipetLiverpool
telegrafi sport app