Deputetët kritikojnë ministren Hoxha për raportin e progresit

Ministrja e Integrimit Dhurata Hoxha ka raportuar në Komisionin Parlamentar për Integrime Evropiane rreth raportit të progresit për Kosovën të publikuar ditë më parë.

Ajo tha se raporti evidenton progresin e arritur duke filluar me zgjedhjet e vitit 2017, në administratë publike.

“ Tjetër e arritur ratifikimi i marrëveshjes së demarkacionit, është shënuar progres në zbatimin e pakos ligjore në integrimin e gjyqtarëve dhe prokurorëve serb në sistemin e drejtësisë e po ashtu njihen përparime edhe në korrupsion për rastet e shenjëzuara.

Armend Zemaj, nga LDK-ja nuk u pajtua me deklaratat e ministres Hoxha duke i thënë se Kosova në fushat kryesore nuk ka shënuar progres.

“Duhet ta ballafaqohemi me realitetin, atë që ju po e quani progres nuk jeni të sinqertë, gjithçka që flitet për progres ka të bëjë me fillim të vitit 2017, përpos ratifikimit të marrëveshjes mars 2018, kjo nënkupton edhe kontributin e plotë të opozitës. Detyrimet që është dasht të përmbushen janë të vogla. Si do t’ia mundësoni Kosovës që këtë vit të përfundohet liberalizimi i vizave. Lufta kundër korrupsionit mbetet sfidë akoma raporti nuk pasqyron ndonjë të arritur”.

Deputetja e VV-së Fitore Pacolli e quajti përgjegjëse ministren Hoxha për dështimin e Kosovës në raportin e fundit, pasi që sipas saj dështimi në sistemin e drejtësisë i përket edhe asaj.

“Ty të rrok barra dyfish për dështimin e raportit, ju keni qenë ministre e Drejtësisë dhe tash ministre e Integrimit Evropian. Për këto dyja duhet të japësh llogari. Gjithmonë në raportime keni thënë se jemi në rrugë të drejtë, ky raport po thotë se kemi ngecje si shtet në agjendën evropiane. Në luftimin e korrupsionit keni theksuar se i ka përmbush Kosova kushtet, keni sjell në Kuvend projektligjin për demarkacionin, raporti konstaton se nuk është përmbush ai kusht”, tha ajo.

Deputeti Ilir Deda nga Alternativa, bëri thirrje që të aprovohet sa më shpejtë ligji për konfiskimin e pasurisë së paluajtshme si dhe tha se ministrja Hoxha duhet të ngris zërin në Qeveri që të luftohet korrupsioni me një ritëm më të shpejtë.

“Ta aprovojmë ligjin për konfiskim të pasurisë së paluajtshme, ministri i Drejtësisë ka thënë se është gati ligji ta bëni këtë më shpejtë, jemi në tren të fundit për liberalizim të vizave, në maj duhet të përfundohet”, tha Deda. /kp/Telegrafi/