Coronavirusi nuk pritet të ndryshojë kushtet e marrëveshjes tregtare SHBA-Kinë

Qeveria amerikane pret që Kina të mbajë premtimin për të blerë mallra të importit, nën marrëveshjen tregtare të nënshkruar në muajin janar, pavarësisht përhapjes së shpejtë të Coronavirusit.

Departamenti i Thesarit deklaroi se është shumë herët për të vlerësuar ndikimin e virusit tek ekonomia botërore, por skenari më i mirë tregon për një rënie të ekonomisë kineze në tremujorin e parë, ndjekur nga një rimëkëmbje e shpejtë më vonë.

Ministria kineze e Tregtisë deklaroi gjatë fundjavës se eksportet dhe importet për dy muajt e parë të vitit do të goditen nga epidemia, por shtoi se kompanitë e huaja do të rinisin prodhimin deri në fund të muajit shkurt.

Zyrtarët e Thesarit në SHBA bënë të ditur se nuk priten ndryshime në zbatimin e marrëveshjes së fazës së parë tregtare.

Sipas marrëveshjes, që hyri në fuqi në muajin shkurt, Kina ka premtuar të rrisë importet e mallrave amerikane me 77 miliardë dollarë në vitin 2020 dhe me 123 miliardë dollarë në vitin e ardhshëm.

Ekspertët janë treguar skeptik mbi mbajtjen e këtij premtimi nga Kina, që përpara shfaqjes së Coronavirusit. /Telegrafi/