COP26: Kina dhe SHBA bien dakord për të rritur bashkëpunimin për klimën

Kina dhe SHBA kanë rënë dakord të rrisin bashkëpunimin për klimën gjatë dekadës së ardhshme, në një njoftim të papritur në samitin e klimës COP26 në Glasgow.

Sipas bbc, përcjell Telegrafi, të dy vendet lëshuan një deklaratë të rrallë të përbashkët që premton veprim.

Ajo thotë se të dyja palët do të “ritheksojnë angazhimin e tyre të vendosur për të punuar së bashku” për të arritur objektivin e temperaturës 1.5C të përcaktuar në Marrëveshjen e Parisit.

Ata bënë thirrje për shtimin e përpjekjeve për të mbyllur “hendekun e rëndësishëm” që mbetet për të arritur këtë objektiv.

Shkencëtarët thonë se kufizimi i rritjes së temperaturës globale në 1.5C do të ndihmojë njerëzimin të shmangë ndikimet më të këqija klimatike. Kjo krahasohet me temperaturat para-industriale.

Negociatori kryesor i Kinës për klimën Xie Zhenhua u tha gazetarëve se për ndryshimin e klimës “ka më shumë marrëveshje midis Kinës dhe SHBA-së sesa divergjencë”.

Siç thuhet më tej, ata ranë dakord për hapa në një sërë çështjesh, duke përfshirë emetimet e metanit, kalimin në energji të pastër dhe dekarbonizimin.

Por Kina refuzoi të bashkohej me një marrëveshje në fillim të kësaj jave për të kufizuar metanin – një gaz i dëmshëm serrë. Marrëveshja u nënshkrua nga afro 100 vende të tjera. Kina në vend të kësaj është zotuar të zhvillojë një “plan kombëtar” për të trajtuar metanin.

Xie u pasua nga John Kerry, i dërguari i SHBA-së për klimën, i cili tha se SHBA dhe Kina “nuk kanë mungesë të dallimeve, por për klimën, bashkëpunimi është e vetmja mënyrë për ta kryer këtë punë”.

“Çdo hap ka rëndësi tani dhe ne kemi një rrugë të gjatë përpara nesh”, tha ai. /Telegrafi/