Chelsea i ka shpëtuar humbjes nga Wolverhampton Wanderers në minutat e fundit (1-1), në ndeshjen e zhvilluar para tifozëve në Stamford Bridge, e vlefshme për javën e 30-të në Ligën Premier.

Ishte një gjysmë e parë e zbehtë sa u përket rasteve nga të dyja skuadrat, prandaj edhe rezultati pas 45 minutave mbeti i pandryshuar.

Festa e lojtarëve të Wolverhamptonit pas golit ndaj Chelseat (Foto: Laurence Griffiths/Getty Images/Guliver)

Rezultati u zhbllokua në minutën e 56-të. Raul Jimenez e mori një top në zonë, krijoi hapësirë dhe goditi për ta mposhtur portierin Kepa Arrizabalaga.

Në vazhdim, Blutë rrezikuan përmes Gonzalo Higuain, Pedro e Ruben Loftus-Cheek, mirëpo nuk arritën që të tregoheshin efikasë.

Një tjetër mundësi e pati Willian, mirëpo me gjithë përpjekjet dhe dëshirën për ta barazuar rezultatin, nuk ia doli.

Gonzalo Higuain në ndeshjen kundër Wolverhampton Wanderers (Foto: Mike Hewitt/Getty Images/Guliver)

Dhe kur pritej që vendasit ta humbin ndeshjen, në skenë doli Eden Hazard, i cili e barazoi rezultatin në minutat shtesë (90’+2).

Ky barazim e lë Chelsean në vend të gjashtë në tabelë, me një pikë prapa vendit të katërt që mbahet nga Manchester Unitedi. Skuadra e Wolverhampton Wanderers pozicionohet vetëm një pozitë më poshtë se Blutë, mirëpo ndodhet 13-të pikë prapa.

Në xhiron e ardhshme, Chelsea luan kundër Evertonit, ndërsa Wolves do të jenë të lirë (pasi është shtyrë ndeshja kundër Arsenalit). /Telegrafi/