Blero i zhgënjyer me Përfaqësuesen e Kosovës: Nuk ua patëm për borxh që të na i bëni fëmijët tonë të qajnë

Kosova nuk e ka nisur mbarë rrugëtimin për në Euro 2024 që mbahet në Gjermani.

Fillimisht, Dardanët barazuan në udhëtim te Izraeli me rezultat 1-1 më 25 mars, ndërsa kishim mundësi të fitonim tri pikë – po të mos dështonte Milot Rashica nga afërsia në minuta e fundit të ndeshjes.

Lidhur me këtë, ka pasur reagime të shumta në rrjetet sociale nga tifozë të Përfaqësueses së Kosovës.

Një ndër ta është edhe hit-këngëtari i estradës, Blero Muharremi, i cili ka bërë një reagim të gjatë të publikuar në InstaStory.

“Israel vs Kosova i dashuri jonë selektor e shtin Zhegrovën titullar, kur dihet se ata kanë me sulmu dhe Zhegrova detyrohet të luajë në mbrojtje, kurse Kosova vs Andorra, Zhegrovën e len në bankë, dhe i bjen në mend thotë ‘Uuuu po njëmend ne kemi me sulmu, ço e fute Zhegrovën në pjesën e dytë. Hajmedet haj, s’po di çka me thanë më shumë, domethënë pa tekst! WTF qenka mi heq këta selektorë që i kanë ka 500 vjet bre… Allo, se isha duke e këqyr lojë me fansen më të zjarrtë dardane, çikën time. Nuk ua patëm për borxh mi shti fëmijët tonë me qajt! Tmerr!”, ka shkruar ndër të tjerash Blero.

Këngëtari me prejardhje nga Mitrovica njihet edhe për miqësinë e mirë që ka me disa prej futbollistëve të Përfaqësueses së Kosovës. /Telegrafi/