Baçev: Votimi i mbrëmshëm ishte kundër vullnetit të popullit të treguar në referendum

Mbrëmë, qeveria hyri në një aventurë të rrezikshme që të shkojë kundër vullnetit të popullit të saj të shprehur në referendumin më 30 shtator, thotë Janko Baçev nga partia “Maqedonia e Vetme”, përcjell Telegrafi Maqedoni.

“Populli maqedonas dhe shumica e qytetarëve të Republikës së Maqedonisë më 30 shtator kanë deklaruar qartë se nuk duan anëtarësimin në NATO dhe nuk duan të ndryshojnë emrin, identitetin, historinë dhe traditën e popullit maqedonas”, tha Baçev.

Ai tha se partia “Maqedonia e Vetme” në një deklaratë publike më 2 tetor, paralajmëroi se janë në lojë 2 milionë euro për deputet.

“Për fat të keq, ryshfeti u konfirmua mbrëmë. Goja e Zoran Zaevit është e mbushur plot me integrimet euro-atlantike, Evropën e respektimit të sundimit të ligjit. Cila është ajo Evropë në të cilën 2 milionë euro i janë dhënë një deputeti për të votuar për tradhti kundër atdheut të tij ose për të shkuar në burg nëse nuk voton sipas urdhrave të pushtetit”, thuhet në deklaratën e partisë “Maqedonia e Vetme”.

Nga atje shtojnë se cila është ajo Evropë në të cilën mercenarët-terroristë lëshohen nga burgu për të votuar, deri dje qeveria e Zaevit a nuk i quante terroristë tre deputetët që mbrëmë nuk arritën të qëndrojnë dhe votuan kundër popullit maqedonas dhe shtetit të Maqedonisë, thuhet në deklaratë. /Telegrafi/