Armond Morina: “Familja Moderne” mbetet familja e dytë e imja

Aktori i njohur shqiptar, Armond Morina, ka një karrierë shumëvjeçare në aktrim.

Ai njihet për rolet e tij të shumta në teatër, filma dhe seriale, ku kryesisht dominojnë rolet e tij të zhanrit komedi.

Rasti i fundit ku publiku pati mundësinë ta shohë është filmit aksion/komedi “Adnan Kafazi”, i cili u dha premierë pak javë më parë në kinemanë ‘Cineplexx’ në Prishtinë.

Në një bisedë për Telegrafin, Morina tregoi se roli i tij në këtë film ka qenë pak më ndryshe nga sa publiku e ka njohur më parë prej roleve të tjera.

“Komedia është një zhanër shumë spirituoz, aty nëse nuk arrihet efekti – atëherë nuk e ke arritur. Unë kam pasur shumë eksperiencë në komedi, edhe pse te ‘Adnan Kafazi’ jam bukur një rol dramë, një vrasës – jam jo shumë komik në këtë film”, ka thënë Armond Morina për Telegrafin.

Pavarësisht viteve, dy nga rolet e tij ikonike mbeten ato në hit-serialet vendore “Familja Moderne” dhe “Kombinati”.

I pyetur mbi eksperiencën në serialin “Familja Moderne” dhe nostalgjinë për atë kohë, Morina tregoi se patjetër që e ndjen, pasi kastin e familjes e konsideron si “familje të dytë”.

“Ne e kemi parë impaktin që e ka bërë ‘Familja Moderne’, e ka sjellë një produkt të ri, siç po e bjen tani ‘Adnan Kafazi’, një zhanër të ri. Patjetër që kam nostalgji, 10 vjet janë bërë me ‘Familjen Moderne’, ajo është familja e dytë e imja”, theksoi Armondi.

Megjithatë, ai nuk mendon se këto role janë identifikuese të tij në karrierën si aktor, pasi ka pasur edhe plot role të tjera të tij, që kanë lënë gjurmë ndër vite.

“Jo shumë, ka pasur masandej role e role në teatër dhe film. Tani prodhimi i shpeshtë edhe ia humb, sepse me lujt shumë gjatë, është edhe rreziku normalisht”, tha Morina.

Aktori i cili ushtron edhe profesionin e profesorit të aktrimit në Akademinë e Arteve, tha për Telegrafin se mundohet që t’ua bëjë të ditur studentëve se një aktor i mirëfilltë i ditëve të sotme, nuk ka zhanër.

“Unë edhe kur kam shpjeguar aktrim në orët e aktrimit kam thënë që aktori moderne sot nuk ka më zhanër, ai duhet të jetë i përgatitur që të luajë nga ‘Hamleti’ e deri te ‘Kombinati’, te ‘Familja Moderne’, të gjitha duhet t’i luajë”, përfundoi Armond Morina.

Në filmin e fundit në të cilin ai është pjesëmarrës, “Adnan Kafazit”, aktorit Morina i është besuar një prej roleve kryesore. /Telegrafi/