Albion Rrahmani, ylli që po shndrit te Ballkani – Nga forma e shkëlqyer dhe golat, te objektivat dhe idhulli i tij

Sulmuesi Albion Rrahmani po kalon në një super formë në këtë fillim sezoni te Ballkani, pasi ka shënuar plot pesë gola në dy ndeshje në kuadër të takimeve kualifikuese në Ligën e Konferencës. Në një intervistë për Telegrafin, Rrahmani ka folur për formën e tij, objektivat individual dhe ekipor, si dhe idhullin e tij.

Fillimi i sezonit dhe garat evropiane kanë shpërfaqur talentin e madh që një sulmues nga Kosova mban mbi vete.

Bëhet fjalë për djaloshin llapjan, Albion Rrahmani, i cili luan me Ballkanin dhe është djali i ish-futbollistit të njohur Driton Rrahmani.

Rrahmani u transferua verën e kaluar te Ballkani pas një super-sezoni me Malishevën në Ligën e Parë, ku edhe u emërua nga tifozët si “Lewandowski”.

Sezoni i tij i parë në Superligën e Kosovës ishte një ‘provë’ për Rrahmani, i cili kishte vetëm 20-vjet, por sa herë iu dha mundësia tregoi talentin e tij duke shënuar disa herë dhe në fund u shpall kampion me klubin therandas.

Si kampion i Kosovës, Ballkani doli të luante në kualifikimet e Ligës së Kampionëve, ku nuk pati mjaftueshëm fat duke u eliminuar nga Zalgiris dhe në këtë ndeshje erdhi debutimi i Rrahmanit në garat evropiane, pasi djaloshi nga Podujeva u inkuadrua në minutën e 72-të të ndeshjes së parë.

Por, ndeshjet e Ligës së Konferencës bënë që Rrahmani të shpërthej dhe të tregoj talentin e madh që mban mbi vete, edhe për faktin se iu dha një fanellë titullari në të dy takimet, duke shënuar pesë gola.

Në ndeshjen e parë ndaj La Fiorita të fituar me rezultat 0-4, 21-vjeçari gjeti rrjetën në minutën e 23-të dhe në minutën e 50-të.

Ndeshja e dytë në Prishtinë, e fituar me rezultat 6-0 nga Ballkani, bëri që Rrahmani të jetë i pakapshëm për kundërshtarin, pasi shënoj het-trik.

Golat e tij erdhën në minutat 6’, 8’ dhe 69’.

Në një intervistë për portalin Telegrafi, Rrahmani ka folur për formën e tij, motivimin, objektivat personal dhe ekipor, si dhe idhulli që ka.

Jeni lojtari më në formë i Ballkanit në ndeshjet evropiane, cili është motivimi dhe çfarë ndikoi te shpërthimi jot këtë fillim sezoni?

“Motivimi ka qenë shumë i madh sepse kjo është hera e parë që kam luajtur në garat evropiane. Shpresoj të vazhdoj kështu në ndeshjet e tjera, ta ndihmoj ekipin për fitoret e radhës”, ka thënë fillimisht Rrahmani për Telegrafin.

Në ndeshjet e ardhshme do të luani ndaj Klaksvik, çfarë prisni nga kjo ndeshje?

“Jemi shumë te gatshëm për ndeshjen e radhës dhe mendoj që do të shënojmë fitore edhe në këtë ndeshje dhe të vazhdojmë tutje”.

Cili është objektivi yt personal dhe ekipor këtë sezon?

“Objektivi im personal është që të shënoj sa më shumë gola, ta ndihmoj ekipin sa me shumë dhe të futemi në grupet e Ligës së Konferencës dhe të shpallemi përsëri kampion i Kosovës”.

Nga shumë njihesh si “Lewandowski”, por cili sulmuesi është idhulli jot i vërtetë apo modeli që ndjek?

“Idhulli im është Cristiano Ronaldo, por patjetër që edhe Lewandowski është shembull shumë i mirë për t’u ndjekur”, përfundoi sulmuesi llapjan.

/Telegrafi/