Në prezantimin e Luis Enriques si trajner ri i Paris Saint-Germain, në konferencë ishte i pranishëm edhe presidenti i klubit parisien, Nasser Al-Khelaifi ku foli edhe për Kylian Mbappen.
Ai ia bëri me dije francezit që nuk do të largohet falas, pra ose nënshkruan kontratë të re, ose shitet këtë verë.
"Pozicioni im është shumë i qartë. Nuk dua ta përsëris çdo herë: nëse Kylian dëshiron të qëndrojë, ne duam që ai të qëndrojë”.
“Por ai duhet të nënshkruajë një kontratë të re. Ne nuk duam të humbasim lojtarin më të mirë në botën falas. Ne nuk mund ta bëjmë këtë gjë.
“Ai kishte thënë se nuk do të largohej kurrë si lojtar i lirë. Nëse ai ndryshon mendje sot, nuk është faji im. Kjo është shumë e qartë", ka thënë Al- Khelaifi.
Mbappe futet në vitin e fundit të kontratës së tij me PSG-në dhe vitin e ardhshëm do të jetë lojtar i lirë, pasi kontrata që kishte me klubin ishte e vlefshme deri në vitin 2024, me mundësi vazhdimi edhe për një vit me vendimin e lojtarit.
Klubi parisien nuk e dëshiron këtë gjë dhe duket se është i gatshëm t’i dëgjojë ofertat. /Telegrafi/
