Agnelli tregon arsyen e dorëheqjes si presidenti i Juventusit

Andrea Agnelli thotë se nuk ishte e lehtë të jepte dorëheqjen si president i Juventusit, por e bëri këtë për të shmangur ndikimin në vendimet në hetimin që përfshin Zonjën e Vjetër.

Ish-presidenti i Bianconerëve kryeson mbledhjen e tij të fundit të aksionerëve në Torino. Ai dha dorëheqje më 28 nëntor së bashku me pjesën tjetër të bordit të drejtorëve, duke përfshirë nënpresidentin Pavel Nedved dhe drejtorin ekzekutiv Maurizio Arrivabene.

Të hënën, më 26 dhjetor, Exor, kompania Holding me aksione kontrolluese në klub, emëroi anëtarët e rinj të bordit që do të emërohen zyrtarisht sot.

Agnelli hapi mbledhjen e sotme të aksionerëve me një fjalim të shkurtër: “I uroj më të mirën Presidentit të ardhshëm Ferrero dhe drejtorit të ri ekzekutiv Scanavino. Do të bëj vlerësime të mëtejshme në mbledhjen e bordit të drejtorëve më 18 janar”.

“Largimi nga presidenca nuk ishte një vendim i lehtë për mua. Përveç që e dua Juven, kam punuar shumë për të arritur rezultatet e jashtëzakonshme të viteve të fundit, brenda dhe jashtë fushës”.

“E mora këtë vendim në qetësi të plotë, mbetem i bindur për punën e mirë të gjithë këtyre viteve, një mendim i konfirmuar edhe në javët e fundit nga analiza e shumë ekspertëve: Juventusi do të tregojë legjitimitetin e tij në çdo rrugë”, vazhdoi ai.

“Mendova se ishte e përshtatshme të bëja një hap prapa, për të shmangur që mund të mendohej se zgjedhjet dhe vendimet që do të merren tani e tutje janë të kushtëzuara nga përfshirja ime personale”.

“Ishte nder të isha president i Juventusit, i cili është para gjithçkaje dhe të gjithëve. Fino Alla Fine”, përfundoi fjalimi i tij.

Agnelli u emërua president i Juventusit në vitin 2010 dhe fitoi 19 trofe gjatë periudhës së tij 13-vjeçare në krye të klubit. Juventusi dhe 12 nga drejtorët aktualë dhe ish-drejtorët e tyre janë aktualisht nën hetim për kontabilitet të rremë dhe komunikim të rremë financiar, ndër të tjera. /Telegrafi/