Atletico Madrid ka emëruar zyrtarisht Mateu Alemany si drejtorin e ri të futbollit për ekipin e meshkujve.
Në një deklaratë zyrtare, klubi madrilen njoftoi:
“Mateu Alemany i bashkohet Atletico Madrid si drejtori i ri i futbollit profesionist për meshkuj. Ai do të jetë pjesë e strukturës së drejtuar nga Carlos Bucero, drejtori i përgjithshëm i futbollit, dhe do të udhëheqë të gjitha çështjet që lidhen me ekipin e parë të meshkujve, Atletico Madrileno dhe aspektet profesionale të akademisë”.
Alemany e nisi detyrën e re menjëherë këtë mëngjes, duke vizituar ekipin e parë në qendrën stërvitore të Majadahondas së bashku me Carlos Bucero.
Të dy zhvilluan takime me trajnerin Diego Simeone dhe u prezantuan edhe para lojtarëve që po stërviten në Madrid.
Ish-drejtuesi i Barcelonës shërbeu si drejtor sportiv në “Camp Nou” për rreth dy vite, para se të largohej në vitin 2023, me Deco që mori postin e tij.
Gjatë periudhës në Barcelonë, Alemany ishte përgjegjës për disa prej afrimeve më të rëndësishme të klubit, përfshirë Jules Kounde, Robert Lewandowski, Raphinha dhe Ferran Torres, të gjithë tashmë pjesë kyçe e skuadrës së Hansi Flick. /Telegrafi/
