Zvicra ekstradon në SHBA biznesmenin rus Vladislav Klyushin

Zvicra ka ekstraduar në Shtetet e Bashkuara biznesmenin rus Vladislav Klyushin, ku ai akuzohet për tregti të paligjshme të brendshme me vlerë dhjetëra milionë dollarë.

Në një deklaratë të Ministrisë së Drejtësisë të Zvicrës thuhet se Klyushin i është dorëzuar një polici amerikan në Cyrih, i cili do ta shoqërojë në fluturimin për në Shtetet e Bashkuara të Amerikës, transmeton Politico.

Klyushin është pronar i grupit M13, një kompani ruse e specializuar në bazat e të dhënave dhe burimet e IT, dhe spekulohet se ai është i lidhur ngushtë me Qeverinë e Rusisë.

Ai u arrestua më 21 mars të këtij viti teksa po bënte ski në Zvicër, ndërsa në prill ambasada amerikane në Bernë kishte paraqitur kërkesë për ekstradimin e tij.

Ministria e Drejtësisë e miratoi kërkesën në qershor dhe Gjykata Federale Zvicerane hodhi poshtë ankesën e Klyushin në fillim të dhjetorit.

Ambasada ruse në Zvicër vlerësoi se bëhej fjalë për “gjueti” të autoriteteve amerikane për shtetas rusë.

Avokati i Klyushin, Oliver Sirik, tha se kërkesa amerikane për ekstradim ishte e motivuar politikisht dhe “e lidhur me natyrën e punës së tij dhe kontaktet me Qeverinë e Rusisë”. /kp/Telegrafi/