Florent Malouda nuk është më trajner i skuadrës zvicerane Zurich.

Ish-reprezentuesi francez iu bashkua stafit të klubit të madh zviceran në muajin shkurt, por aventura e tij nuk ka zgjatur më shumë se gjashtë javë.

Ka qenë vetë klubi zviceran që nëpërmjet Twitterit ka shkarkuar ish-sulmuesin francez.

“Nuk janë arritur pritshmëritë me Florent Maloudan dhe ne i dëshirojmë atij fat dhe suksese në karrierën e tij”, shkruhej në njoftimin e FC Zurich.

E pas postimit të klubit zviceran ka reaguar vet francezi që shkroi në Twitter se nuk ishte i informuar për këtë shkarkim.

“Me të vërtetë, unë nuk e dija këtë..”, shkroi Malouda i çuditur nga vendimi i klubit zviceran.

Zurich është njëra nga skuadrat që ka më së shumti futbollistë shqiptarë në radhët e veta.

Hekuran Kryeziu, Benjamin Kololli, Mirlind Kryeziu, Toni Domgjoni, Lavdim Zumberi, Izer Aliu dhe Bledian Krasniqi janë aktivizuar këtë edicion me skuadrën e parë të Zurichut. /Telegrafi/