Kryeministri i Izraelit ka thënë se bashkësia ndërkombëtare duhet të "zgjohet" me zgjedhjen e presidentit të ardhshëm të Iranit, Ebrahim Raisi.
Sipas mediave të huaja, përcjell Telegrafi, kryeministri Naftali Bennett tha se "regjimi i xhelatëve brutalë" të Iranit dëshiron armë bërthamore - diçka që Irani e ka mohuar në mënyrë të përsëritur.
Ndryshe, Ebrahim Raisi u shpall fituesi i zgjedhjeve presidenciale të Iranit të shtunën. Ai është gjykatësi i lartë i Iranit dhe mban pikëpamje ultra-konservatore.
Në një deklaratë pas fitores së tij, ai premtoi të forcojë besimin e publikut në qeveri dhe të jetë një udhëheqës për të gjithë kombin.
"Unë do të formoj një qeveri punëtore, revolucionare dhe anti-korrupsion", citoi media shtetërore të thoshte ai.
Sipas mediave, gara zgjedhore u pa gjerësisht se ishte krijuar për të favorizuar Raisin.
Presidenti i zgjedhur - i cili do të inaugurohet në gusht - është nën sanksionet e SHBA-së dhe ka qenë i lidhur me ekzekutimet e kaluara të të burgosurve politikë.
Në një takim të kabinetit izraelit të dielën, Bennett u tha kolegëve se ky ishte "shansi i fundit për fuqitë botërore që të zgjohen ... dhe të kuptojnë me kë kanë punë".
"Një regjim i xhelatëve brutalë nuk duhet të lejohet kurrë të ketë armë të shkatërrimit në masë". /Telegrafi/
