Zaev-Jan Kop: Ambicie dhe plane premtuese për punë efikase të Qeverisë së re dhe përcaktime për sundim të së drejtës

Kryetari i Qeverisë së Republikës së Maqedonisë së Veriut, Zoran Zaev, sot u takua me Dirk Jan Kop, ambasador i Mbretërisë së Holandës në vendin tonë.

Në takim, siç kumtoi shërbimi qeveritar për shtyp, u shprehën urime për formimin e Qeverisë së re në pajtim me afatet ligjore dhe kushtetuese. Me atë rast u konstatua se në fillim të funksionimit të Qeverisë, janë të dukshme ambiciet dhe planet për punë efikase të Qeverisë. Në takim, qëndron në kumtesë, u vlerësua se marrëdhëniet e mira fqinjësore janë vlerë edhe për vendin tonë edhe për rajonin dhe se ekziston klimë relaksuese në vend për punë të përkushtuar në plan të brendshëm.

“Është i përbashkët qëndrimi se sferat, të cilave duhet t’iu kushtohet vëmendje e posaçme në periudhën në vijim janë sundimi i së drejtës dhe lufta kundër krimit dhe korrupsionit, ku është bërë progres i madh në legjislaturë, e cila tani duhet tërësisht të implementohet”, ceket në kumtesë.

Kryeministri Zaev sqaroi se Qeveria është fuqimisht e përkushtuar në këto prioritete.

“Tani është koha për rezultate në planin e ekonomisë, sundimit të së drejtës dhe luftës kundër korrupsionit. Jemi të fokusuar të vendosim drejtësi funksionale, për luftë efikase me krimin dhe korrupsionin dje për zhvillim të ekonomisë. Pas zgjidhjes së çështjeve bilaterale me fqinjët, siç tregoi edhe takimi në Athinë, hapëm mundësi për bashkëpunim më intensiv ekonomik edhe në nivel rajonal, që do të sjellë benefite ekonomike për qytetarët e shteteve tona”, tha kryeministri Zaev.

Në takim u bisedua edhe për mundësitë për ndihmë dhe mbështetje nga Holanda në sferat e rëndësishme në procesin eurointegrues si dhe për intensifikim të bashkëpunimit bilateral mes Maqedonisë së Veriut dhe Holandës në sferën e ekonomisë.