Ylli pornografik Stormy Daniels rrezikon të paguajë 20 milionë dollarë dëmshpërblim, për shkelje të marrëveshjes për të mos folur rreth aferës me Trumpin

Avokatët e Donald Trumpit kërkojnë 20 milionë dollarë dëmshpërblim nga Stephanie Clifford – aktorja pornografike, emri i vërtetë i të cilës është Stormy Daniels.

Ylli i filmave për të rritur ka thënë se ka pasur aferë me presidentin aktual të Shteteve të Bashkuara në vitin 2006 dhe në vitin 2007.

Stormy ka thënë se asaj i ishin paguar 130.000 dollarë që të heshtte dhe të mos fliste kurrë për aferën me Trump.

Po ashtu, është raportuar se ajo ka nënshkruar një marrëveshje për ta bërë këtë gjë, mirëpo e ka shkelur mbi 20 herë marrëveshjen e arritur me përfaqësuesit e miliarderit amerikan.

Lexo po ashtu Të gjitha lajmet për STORMY DANIELS

Zëdhënësja e Shtëpisë së Bardhë, Sarah Sanders, i ka hedhur poshtë pohimet se Trump e ka miratuar pagesën për yllin pornografik. Po ashtu, është mohuar afera seksuale e presidentit me Stormyn.

Avokati i Daniels, Michael Avenatti, ka thënë se klientja e tij është kërcënuar se do të paguajë dëmshpërblim prej 20 milionë dollarësh nëse vazhdon ta shkelë marrëveshjen e arritur para shumë vitesh.

“Fakti se presidenti aktual kërkon 20 milionë dollarë ‘dëmshpërblim të rremë’ nga një qytetare e thjeshtë, e cila thjesht po përpiqet t’i tregojë publikut se çfarë ka ndodhur, është diçka e pazakontë… Ne nuk po shkojmë askund dhe nuk do frikësohemi nga këto kërcënime”, ka thënë avokati i aktores.

Sipas tij, edhe gjashtë femra të tjera kanë treguar histori të ngjashme me atë të klientes së tij, ndërsa dy prej tyre janë paguar për të nënshkruar marrëveshje të fshehta për të mos folur.

Nëse gjykata vendos se marrëveshja e nënshkruar nga Stormy Daniels është valide, atëherë ajo duhet të paguajë nga një milionë dollarë për çdo shkelje (20 shkeljet e saja do të thonë dënim prej 20 milionë dollarësh). /Telegrafi/