Të udhëhequr nga Granit Xhaka, Arsenali ka arritur fitore të lehtë me rezultat 3-0 ndaj Bate Borisovit.

Arsenali kishte pësuar humbje minimale 1-0 në ndeshjen e parë dhe që nga fillimi i ndeshjes kthyese filloi të sulmonte.

Skuadra londineze e gjeti golin e epërsisë vetëm katër minuta pas fillimit të takimit.

Pierre Emerick Aubameyang harkoi bukur në zonë ndërsa qendërmbrojtësi mysafir Volkov në tentim për ta larguar topin e dërgoi atë në portën e tij për t’i dhënë epërsinë Arsenalit 1-0.

Topçinjtë vazhduan sulmet e pareshtura në drejtim të portës mysafire, derisa golin e dytë e gjetën në minutën e 39-të.

Granit Xhaka asistoi për mrekulli nga këndi për Shkodran Mustafin që realizoi me kokë për 2-0.

Me epërsinë prej dy golave për vendasit, skuadrat shkuan në pushim prej 15 minutave.

Arsenali vazhdoi dominimin edhe në pjesën e dytë duke sulmuar vazhdimisht.

E pasi kaluan një orë lojë, skuadra e Unay Emery realizoi edhe golin e tretë në ndeshje.

(Foto: Clive Rose/Getty Images/Guliver)

Granit Xhaka asistoi përsëri nga këndi ndërsa Sokratis shënoi për 3-0.

Londinezët deri në fund të ndeshjes patën edhe disa raste të tjera por që rezultati mbeti ai i minutës së 60-të.

Kësisoj Arsenali e përmbysë pa problem Bate Borisovin dhe kalon në 1/8 e finales në Ligën e Evropës. /Telegrafi/