Vela për situatën në veri: Beogradi mbanë përgjegjësi të plotë për çdo përshkallëzim të situatës

Shefi i Stafit të Presidentes, Blerim Vela ka reaguar pas zhvillimeve të fundit në komunat e veriut të Kosovës.

Vela ka shkruar në Twitter, se për çdo përshkallëzim të situatës përgjegjësi të plotë mbanë Beogradi.

“Strategjia e Serbisë është që të rrisë tensionet çdo ditë, që të provokojë përgjigje nga institucionet e Kosovës. Grupet kriminale të Vuçiqit dhe strukturat ilegale dogjën Qendrën e Regjistrimit të Automjeteve. Beogradi mbanë përgjegjësi të plotë për çdo përshkallëzim të situatës”, shkruan Vela në Twitter.

Ndryshe, pasi ministri i Punëve të Brendshme, Xhelal Sveçla mori vendim për reciprocitet me targa me Serbinë, në pikat kufitare Jarinjë e Bërnjak tash e gjashtë ditë serbët lokal kanë vendosur barrikada në rrugë për të kundërshtuar këtë vendim.

Ndërkaq, mbrëmë në ora 01:00 pas mesnate, është djegur Qendra e Regjistrimit të Automjeteve e cila gjendet në objektin e komunës në Zubin Potok.

“Sipas informacioneve të para, supozohet se zjarri ka përfshirë ambientet përdhese të ndërtesës dhe ekziston dyshimi se ka prekur ambientet e qendrës së Ministrisë së Brendshme të Kosovës dhe Bibliotekën e Shtëpisë së Kulturës”, shkruan Policia e Kosovës.

Tutje bëhet e ditur se zjarri është lokalizuar në orët e para të ditës së sotme gjersa është njoftuar edhe prokurori i kujdestar dhe hetimet po vazhdojnë.

“Zjarri u lokalizua rreth orës 02:00, dhe të gjitha njësitë përkatëse të Policisë së Kosovës ishin të pranishme në vend, si dhe Njësia Rajonale e Hetimit – Mitrovicë – Veri. Ne vend ngjarje doli Inspektori i Zjarrit (PPZ), per gjithçka që ndodhi  u njoftua edhe Prokurori kujdestar. Hetimet lidhur me rastin janë duke vazhduar”, thuhet tutje në njoftim. /Telegrafi/

⛔️ #Serbia’s strategy is to increase tensions daily in order to provoke a response from #Kosovo institutions#Vučić’s criminal groups & illegal structures burned down premises of car registration centre#Belgrade bares the full responsibility for any escalation of the situation pic.twitter.com/XsXws3TZoN

— Blerim Vela (@Blerim_Vela) September 25, 2021