Trump mendon që Zelensky është gati të heqë dorë nga Krimea

Presidenti i SHBA-së, Donald Trump, ka thënë se mendon që Volodymyr Zelenskyy është gati të heqë dorë nga Krimea, pavarësisht pohimeve të mëparshme të homologut të tij ukrainas për gadishullin e Detit të Zi që u aneksua nga Rusia në vitin 2014.

Duke folur me gazetarët në një aeroport në New Jersey të dielën, një ditë pas takimit me Zelenskyn në Vatikan, Trump tha “Oh, mendoj se po”, në përgjigje të një pyetjeje nëse mendonte që Zelensky ishte gati të “hiqte dorë” nga territori, shkruan The Guardian, përcjell Telegrafi.

Zelensky tha javën e kaluar se Ukraina nuk mund ta pranonte njohjen e SHBA-së për aneksimin e Krimesë nga Rusia, pasi Trump e akuzoi atë për kokëfortësi për këtë çështje.

Zelensky të premten këmbënguli se territori ishte “pronë e popullit ukrainas”.

Ai nuk iu përgjigj menjëherë komenteve të fundit të Trump.

Ndërkohë, vë në pah mediumi britanik, dy grupe planesh paqeje të publikuara nga Reuters të premten treguan se SHBA-të po propozojnë që Moska të mbajë territorin që ka pushtuar, përfshirë gadishullin strategjik të Krimesë.

Por ministri gjerman i Mbrojtjes, Boris Pistorius theksoi të dielën se propozimi i SHBA-së që Ukraina t’i lëshojë territor Rusisë ishte “i ngjashëm me një kapitullim”.

Në një intervistë me transmetuesin ARD, ai tha se Kievi e dinte se një marrëveshje paqeje mund të përfshijë lëshime territoriale.

Pavarësisht komenteve mbi Krimenë, presidenti i SHBA-së shprehu simpati të re për homologun e tij ukrainas të dielën, duke thënë se ai “dëshiron të bëjë diçka të mirë për vendin e tij” dhe “po punon shumë”.

Duke reflektuar mbi bisedën e tij me presidentin ukrainas, presidenti i SHBA-së tha gjithashtu se ishte “i befasuar dhe i zhgënjyer, shumë i zhgënjyer” që Rusia kishte bombarduar Ukrainën pas diskutimeve midis presidentit të Rusisë, Vladimir Putin, dhe të dërguarit të paqes të Trump, Steve Witkoff.

“Isha shumë i zhgënjyer që raketat po fluturonin, nga Rusia”, ka thënë presidenti amerikan.

Trump tha se Zelensky “më tha se i duhen më shumë armë, por ai e ka thënë këtë për tri vjet”.

Ndërsa i pyetur se çfarë dëshiron të bëjë Putini, Trump u përgjigj: “Epo, dua që ai të ndalojë së qëlluari. Ulu dhe nënshkruaj marrëveshjen. Ne kemi kufijtë e një marrëveshjeje, besoj, dhe dua që ai ta nënshkruajë atë dhe të mbarojë me të”. /Telegrafi/