Trump: A e përmendi vërtet Medvedevi fjalën nukleare, nëse konfirmohet më lajmëroni menjëherë

Presidenti amerikan Donald Trump ka kërcënuar të lëshojë “armët më të fuqishme dhe vdekjeprurëse të ndërtuara ndonjëherë” nëse Rusia furnizon Iranin me koka bërthamore.

Trump, dy ditë pasi SHBA-të kryen sulme në centralet bërthamore iraniane, transmetoi një deklaratë nga Rusia dhe një paralajmërim për vendin, transmeton Telegrafi.

“A e dëgjova ish-presidentin Medvedev, nga Rusia, duke përdorur fjalën “N” (Nukleare!), dhe duke thënë se ai dhe vende të tjera do ta furnizonin Iranin me koka bërthamore”, shkroi Trump në platformën e tij Truth Social të hënën në mëngjes.

“A e tha vërtet këtë apo është thjesht një pjellë e imagjinatës sime? Nëse e tha këtë, dhe nëse konfirmohet, ju lutem më njoftoni menjëherë. Fjala “N” nuk duhet të trajtohet kaq rastësisht”, shtoi Trump.

Ai vazhdoi të lavdëronte sulmet ajrore të SHBA-së mbi Iranin të shtunën, të cilat përfshinin hedhjen e bombave “shkatërruese të bunkerëve” në impiantin e pasurimit të uraniumit në Fordow. Dhe Trump sugjeroi që armiqtë nuk i kanë parë ende armët më të fuqishme të Amerikës.

“Meqë ra fjala, nëse dikush mendon se “pajisjet” tona ishin të shkëlqyera gjatë fundjavës, padyshim pajisjet më të forta dhe më të mira që kemi, 20 vjet më të avancuara se të tjerët, janë nëndetëset tona bërthamore”, shkroi Trump.

“Ato janë armët më të fuqishme dhe vdekjeprurëse të ndërtuara ndonjëherë, dhe sapo lëshuam 30 raketat Tomahawk – të 30 goditën shenjën e tyre në mënyrë perfekte”, shtoi presidenti amerikan.

Dmitry Medvedev, i cili është nënkryetar i Këshillit të Sigurisë së Rusisë, shkroi të dielën në X se “një numër vendesh janë gati të furnizojnë drejtpërdrejt Iranin me kokat e tyre bërthamore”. /Telegrafi/