Ka përfunduar java e 25-të në elitën e futbollit kosovar ku janë arritur kryesisht rezultate të pritura.

Favoritët si Drita, Gjilani, Prishtina, Ballkani e Feronikeli kanë marrë fitore në shtëpi, teksa Flamurtari ka triumfuar si mysafir i Drenicës.

Edhe këtë javë në formë të lartë kanë qenë ‘bomberët’ e Superligës, ku kanë shënuar gola dhe gara për Këpucën e Artë po bëhet gjithnjë e më e zjarrtë.

Shënuesi më i mirë në Ipko Superligë është aktualisht Arb Manaj, që me golin ndaj Ballkanit arriti në kuotën e 13 golave këtë kampionat.

Manaj ndiqet nga tre lojtarë që janë në vendin e dytë dhe që kanë shënuar nga 11 gola dhe ata janë: Kastriot Rexha, Blend Baftiu dhe Ahmed Januzi.

Dyshja e Gjilanit, Fiton Hajdari dhe Gerhard Progni ndajnë pozitën e pestë me nga 10 gola deri më tani.

Nga nëntë gola kanë shënuar Betim Haxhimusa i Dritës dhe Mevlan Zeka i Feronikelit, ndërsa lista e top 10 shënuesve më të mirë mbyllet me Shend Kelmendin e Oto John që kanë nga tetë sosh. /Telegrafi/