“Të martën ferr”, në Itali temperaturat vazhdojnë të rriten – pritet të thyhet rekordi

Edhe para pikut të nxehtësisë që pritej të martën, merkuri në termometër u rrit me një tjetër shkallë sot në Itali, gjë që nuk i pengoi turistët nga plazhet, muzetë dhe vendet antike.

Gjithsej 16 qytete të mëdha italiane janë vënë sot nën alarm të kuq të nxehtësisë, duke përfshirë Bolonja, Firence, Romë, Cagliari në Sardenjë, Palermo dhe Katania në Siçili, me temperatura që priten në hije rreth 35 dhe 36 gradë Celsius, por me ndjesinë e nxehtësisë afër 40 gradë, transmeton Telegrafi.

Roma është nën një diell të fortë dhe tashmë rreth orës 11 është regjistruar rreth 30 gradë Celsius. Në kopshtin zoologjik të kryeqytetit, rojet tashmë kanë filluar t’i ushqejnë kafshët me fruta të ngrira për t’i ftohur.

Në Vatikan, mijëra njerëz përballen me të nxehtin çdo ditë për të hyrë në muzetë e tij prestigjioze. Sot në mëngjes një numër i madh turistësh kanë pritur me orë të tëra në sheshin e Shën Pjetrit për të dëgjuar lutjen tradicionale të dielave nga dritarja, transmeton France Press.

Shërbimi meteorologjik italian CMI njoftoi se i druhet vapës më të fortë këtë verë, por edhe shirave të dendur.

Në Romë, të quajtur “qyteti i ferrit” nga gazetarët, temperaturat mund të rriten në 40 gradë Celsius nesër dhe më pas në 43 ose 43 gradë të martën, duke thyer rekordin e mëparshëm të nxehtësisë prej 49.5 gradë Celsius të regjistruar në kryeqytetin italian në gusht 2007.

Megjithatë, temperaturat më të larta priten në Sardenjë. Rekordi i temperaturës prej 48.8 gradë Celsius më 11 gusht 2021, që ishte temperatura më e lartë e regjistruar ndonjëherë në Evropë, mund të thyhet.

Nxehtësia është një nga fenomenet meteorologjike më vdekjeprurëse, kujtoi së fundmi Organizata Botërore Meteorologjike. Verën e kaluar, sipas një studimi të publikuar së fundmi, temperaturat e larta ishin shkaku i më shumë se 60,000 vdekjeve vetëm në Evropë. /Telegrafi/

Caldo record in tutta Italia con temperature sopra la media. In Sicilia e Sardegna picchi fino a quarantotto gradi. pic.twitter.com/dHbXPjckhO

— Tg3 (@Tg3web) July 16, 2023