Si u bë Katari një lojtar kyç në bisedimet diplomatike me Hamasin?

Shteti i vogël i Gjirit Persik, Katari, është përsëri në qendër të diplomacisë globale, këtë herë për përpjekjet e tij për të ndërmjetësuar marrëveshjet për lirimin e pengjeve të marra nga Hamasi gjatë sulmeve të tij të 7 tetorit në Izrael, si dhe për evakuimin e shtetasve të huaj nga Gaza.

Sipas mediave të huaja, përcjell Telegrafi, të mërkurën, Katari ndërmjetësoi një marrëveshje midis Izraelit, Hamasit dhe Egjiptit, në koordinim me Shtetet e Bashkuara, për lirimin e shtetasve të huaj dhe civilëve palestinezë të plagosur rëndë nga Gaza në Egjipt, sipas burimeve të njohura me bisedimet.

Marrëveshja ishte e ndarë nga çdo negociatë pengjesh, shtoi burimi.

Kështu, të paktën 110 mbajtës të pasaportave të huaja u larguan nga Gaza, sipas zyrtarëve në anën palestineze të kalimit kufitar Rafah.

Spitali Al-Arish në Egjipt gjithashtu filloi të marrë palestinezë të plagosur që kaluan nga Gaza, sipas lajmeve të Al-Qahera.

Dhe Katari e gjen veten në një pozicion diplomatik delikat, një pozicion që ekspertët thonë se deri më tani ka vepruar në dobi të tij, duke e bërë atë një aleat të domosdoshëm të Uashingtonit.

Monarkia e pasur me gaz ka mbajtur një marrëdhënie me Hamasin ndërsa është një nga aleatët më të ngushtë të SHBA-së në rajon.

Ndërkohë, ka mbajtur gjithashtu “kontakte” me Izraelin.

Natyra e marrëdhënies së Katarit me Hamasin

Në vazhdën e kryengritjeve të Pranverës Arabe të vitit 2011, Katari u gjend në konflikt me disa nga fqinjët e tij arabë pasi mbështeti protestuesit që kërkuan të përmbysnin regjimet në disa vende arabe.

Marrëdhëniet u përkeqësuan më tej kur Arabia Saudite, Bahreini, Emiratet e Bashkuara Arabe dhe Egjipti ndërprenë marrëdhëniet diplomatike me Katarin në mesin e vitit 2017, duke e akuzuar vendin për mbështetjen e terrorizmit, të cilin Katari e mohoi në mënyrë të përsëritur.

U deshën vite që vendet të rregullonin marrëdhëniet.

Në vitin 2012, ai lejoi Hamasin e mbështetur nga Irani të krijonte një zyrë politike në Doha, e cila mbetet operative.

Katari gjithashtu paguan pagat e sektorit publik në Gaza, pjesë e një pagese prej 30 milionë dollarësh në muaj për familjet dhe karburantet për energjinë elektrike, sipas Reuters.

Ai gjithashtu ka mbajtur marrëdhënie të ngushta me vendet perëndimore, duke u bërë një furnizues gjithnjë e më i rëndësishëm energjie si një nga prodhuesit më të mëdhenj të gazit në botë dhe është një blerës i madh armësh nga SHBA, përcjell Telegrafi.

Por disa kanë thënë se marrëdhënia e Katarit me Hamasin mund të bëhet “e vështirësuar”.

Doha është kritikuar nga Izraeli dhe politikanët perëndimorë për lidhjet e tij me Hamasin.

Pavarësisht përpjekjeve të tij ndërmjetësuese, ministri i Jashtëm izraelit Eli Cohen javën e kaluar akuzoi Katarin për financimin e Hamasit dhe strehimin e udhëheqësve të tij.

Në përgjigje, Katari tha se ishte “i befasuar dhe i tronditur” nga komentet e ministrit izraelit, veçanërisht “në një kohë kur Katari po kërkon të sigurojë lirimin e robërve dhe de-përshkallëzimin”. /Telegrafi/