Shefat Isufi kishte një qëllim të shtunën mbrëma – të shpallej kampion i WBO-së në kategorinë super të mesme. Që të ndodhte kjo, ai duhej ta mposhte britanikun Billy Joe Saunders.

Boksieri shqiptar që e përfaqëson Gjermaninë ishte shumë pranë t’ia arrinte qëllimit në raundin e gjashtë, por edhe pse ishte shumë afër ta nokautonte kundërshtarin, anglezi ia doli të mbahej disi dhe në fund fitoi me pikë.

Isufi për pak sa nuk e nokautoi, pranon Saunders: Në raundin e gjashtë isha në një moment të vështirë Isufi për pak sa nuk e nokautoi, pranon Saunders: Në raundin e gjashtë isha në një moment të vështirë

Siç transmeton BozingScene, para meçit, Isufi kishte thënë se donte të bëhej shqiptari i parë që e fitonte këtë titull bote, si edhe dëshironte ta nderonte babanë e ndjerë.

“E bëj këtë në radhë të parë për veten, sepse duhet të fitoj. Por, do të jetë nder që të të bëhem shqiptari i parë që fiton një titull bote. Njëherësh, do të jetë një arritje e madhe për vendim tim (të adoptuar) Gjermaninë që aktualisht është pa një kampion bote”, kishte thënë boksieri i lindur në Tërnoc para duelit.

Shefat Isufi duke e goditur Billy Joe Saundersin (Foto: Luke Walker/Getty Images/Guliver)

Babai i tij, Nasufi, ishte një prej mbështetësve më të mëdhenj të Shefatit kur e nisi boksin në moshën 10 vjeçare. Ai ndërroi jetë kur boksieri ishte shumë i ri dhe nuk arriti që t’i shihte sukseset e njëpasnjëshme të djalit të tij, i cili numëron 27 fitore (20 me nokaut), dy barazime dhe katër humbje.

“Babai im vdiq kur isha i ri. Ai është gjithmonë në mendjen time dhe gjithmonë më ka drejtuar nga lart… Kur të fitoj, do ta vizitoj varrin e babait tim që më ka nxitur dhe më ka mbështetur për të gjitha ëndrrat e mia. Është pikëlluese që nuk do të jetë këtu të më shohë duke e fituar titullin, por do të jem i nderuar që do të mund t’ia prezantoj”, pati deklaruar Isufi në konferencën për shtyp.

Ai nuk ia doli kësaj radhe të shpallej kampion botë, mirëpo është 29-vjeçar dhe ka edhe shumë vite karrierë për të shpresuar që ta mbajë premtimin e tij. /Telegrafi/