“Sezoni festiv në marketing” – si kompanitë në Kosovë po planifikojnë strategjitë e tyre – Gjirafa, Telegrafi e Hallakate tregojnë shërbimet që ofrojnë

Gjatë konferencës Growth Tank është mbajt edhe një panel diskutimi me temën “planifikimi i sezonit festiv në marketing”.

Pjesë e këtij paneli ishin themeluesi dhe drejtori i Gjirafës, Mërgim Cahani, Valon Canhasi themelues dhe drejtor i Hallakate dhe drejtori gjeneral i Telegrafit, Gentian Lluka.

Cahani nga Gjirafa tha se në këtë periudhë kur priten festat e fundvitit njëra prej objektivave më të rëndësishme është “Black Friday”.

“Për Gjirafën njërën prej festave më të rëndësishmeve e kemi ‘BlackFriday’. Është bërë një pjesë e kulturës tonë në kompani dhe një traditë. Një kuti që e kisha në tavolinë shkruante, “November is own’ (nëntori është i joni). Që shtatë vite flemë në zyrë, pa marr parasysh se në cilën njësi punojmë. Porosisim ushqim…është një farë trendi shumë ‘funny’. Çdo vit jemi dyfishu për ‘Black Friday’. Vitin e kaluar në minutat e para i kemi pas dy mijë porosi”, ka thënë Cahani.

Ndërsa, Valon Canhasi nga Hallakate tha se bizneset duhet të bëjnë parapërgatitje kur të hapin ofertat për “Black Friday”.

“Në muajin nëntor qysh para 7 viteve ka nisur me Black Friday. Por ‘tu pa – tu bo’, viteve tjera u dasht me ia nis ma herët. Njerëzit që janë në nivelin e kërkimit të blerjes e donë ‘BlackFriday’. Strategji është që me planifiku shumë më herët. Njerëzit duan me ua bo vendin pareve, pasi s’kanë shumë pare dhe duan ta dinë se ku e lënë paranë e vet”, tha Canhasi.

Ndërkaq, drejtori i Telegrafit, Gentian Lluka tha se Telegrafi ofron mundësi të shumta për integrimin e brendeve të ndryshme brenda platformës.

“Faleminderit për pjesën e Gjiklës, ishte shumë emocionuese. Telegrafi Brand Studio është krijim i Telegrafit. Ne gjithmonë investojmë në teknologji të fundit. Një strategji e mirë nëse fillohet më herët, rekomandojmë që të fillohet nga muaji shtator…

Ne në produkte kemi kemi futur dhe produksionin e videos. Së fundmi, kemi ofruar dhe një produkt tjetër ku hapësirat fizike i kthejmë në ato virtuale. Kemi hapësirë që t’i integrojmë brenda Telegrafit kudo, çdo produkt… Audienca e Telegrafit është shumë  e madhe”, ka thënë Lluka mes tjerash.

Drejtori gjeneral i Telegrafit ka folur po ashtu edhe për rëndësinë e teknologjisë artificiale.

“Telegrafi e ka mundësu TeamGpt për stafin. Për çdo ditë bëjmë eksperimente dhe habitemi se çka po ndodh. Ne e nisim një video ia ofrojmë AI-së, ia kërkojmë ChatGPT-së pesë tituj…Viti i ardhshëm do të jetë vit i integrimit të AI-së në çdo segment brenda Telegrafit”, theksoi drejtori Lluka.

Ndryshe, Growth Tank është konferenca më e madhe e Marketingut Digjital në Kosovë, e cila solli folës nga kompanitë më prestigjioze amerikane dhe evropiane, si Google, Facebook, Rapid Images e Link Marketing. /Telegrafi/