Nëse nuk nisin konsultimet e përbashkëta, ose zgjidhja e problemit rreth taksës për produketet serbe, brenda 90 ditëve të ardhshme, Serbia do të fillojë procedurën para Tribunalit të Arbitrazhit.

Kryeministrja serbe Ana Brnabiq informoi sot qytetarët e Serbisë se në emër të Qeverisë dhe në pajtim me marrëveshjen CEFTA, i dërgoi një kërkesë zyrtare Sekretariatit dhe institucionit për konsultime të drejtpërdrejta brenda Komitetit të Përbashkët.

“Nga nesër, nga marrja e kërkesës, ata kanë një afat prej 90 ditësh kalendarike për të zgjidhur problemin që Kosova e ka bërë me shkelje të drejtpërdrejtë dhe të qartë të marrëveshjeve në konsultime të drejtpërdrejta”, u tha Brnabiq gazetarëve, transmeton KP.

Ajo njoftoi se nëse nuk zgjidhet problemi brenda 90 ditëve të ardhshme, Serbia do të fillojë procedurat para Tribunalit të Arbitrazhit në përputhje me marrëveshjen CEFTA.