“Serbët në veri po përdorin modelin izraelit në Palestinë”

Këshilli për Mbrojtjen e të Drejtave dhe Liritë e Njeriut (KLMDNJ) e ka vlerësuar kolonizim të vendit vendimin për ndërtimin e shtëpive dhe objekteve të tjera për të serbët e kthyer në Kosovë.

Sipas KLMDNJ-së, Qeveria e Kosovës ka lejuar që përmes ndërtimit dhe rindërtimit të shtëpive dhe objekteve fetare serbe të krijohet ndarja etnike, gjë që siç thotë kjo organizatë, po përdoret modeli izraelit i ndërtimit të lagjeve në tokat e okupuara të Palestinës.

“Është planifikuar gjithashtu ndërtimi i shtëpive vetëm për serbë në fshatrat Mushtisht, komuna e Therandës dhe pastaj do të vazhdohet ndërtimi i shtëpive të tjera. KMDLNj ka reaguar menjëherë kundër këtij veprimi të Qeverisë së Serbisë e cila në Kosovë po e përdorë modelin izraelit të ndërtimit të lagjeve në tokat e okupuara të Palestinës të quajtur kibucë që ka për qëllim kolonizimin e atyre vendbanimeve sikur që edhe Serbia ka për qëllim kolonizimin e veriut të Kosovës”, thuhet në reagimin e KLMDNJ-së.

Sipas KLMDNJ-së, është qeveria e Serbisë ajo e cila po ushtron funksionin ekzekutiv në Kosovë, duke mos përfillur autoritetet kosovare për vazhdimin e ndërtimeve pa leje në veri të vendit. Ata vlerësojnë se janë shqiptarët e dëbuar gjatë luftës, ata që po diskriminohen në raport me kthimin në pronat e tyre.

“Pengesë për kthimin e shqiptarëve në veri të Mitrovicës janë Serbia me strukturat paralele (policia, ushtria, paramilitarët), ndërkombëtarët që heshtin duke bërë diskriminime flagrante në baza etnike dhe institucionet e Kosovës për mosveprimin e tyre”, thotë KLMDNJ.

KLMDNJ ka alarmuar edhe për tensionim të situatës në rast të vazhdimësisë së kësaj praktike të shtetit serb në Kosovë, që për pasojë ka cenimin e integritetit territorial dhe shtrirjen e sovranitetit.

“Nëse vazhdohet në këtë mënyrë, eskalimin i situatës në Kosovë është i pashmangshëm, si për kah intensiteti ashtu edhe për pasojat. Mbrojtja e integritetit territorial dhe shtrirja e sovranitetit janë detyrime ligjore dhe kushtetuese të institucioneve të Kosovës dhe mosveprimi në këtë drejtim e vë në rrezik ekzistencën e Kosovës, sigurinë e qytetarëve të Kosovës dhe për pasojë do ta ketë ndarjen e Kosovës”, ka paralajmëruar KLMDNJ.