Sarri shihet si pasues i Mourinhos, do të takohet me drejtuesit e Tottenhamit në Londër

Ish-trajneri i Napolit, Chelseat dhe Juventusit, Maurizio Sarri vazhdon të jetë i lidhur me Tottenham Hotspur, pasi pëlqehet shumë nga drejtuesit e klubit londinez.

Sipas Gazzetta dello Sport, Tottenhami mund të takohet me Sarrin javën e ardhshme për të zhvilluar bisedime mbi mundësinë e zëvendësimit të Jose Mourinhos.

Sarri është pa klub pasi u shkarkua nga Juventusi dhe raportet në Itali këtë javë pretenduan se ai ishte në rrugë për të marrë drejtimin e Spurs.

Lexo po ashtu Shkarkimi i Sarrit i kushtoi Juventusit plot 17 milionë euro

Është sugjeruar që skuadra e Ligës Premier dëshiron të zhvillojë bisedime mbi mundësinë e punësimit të tij.

Bisedimet midis klubit dhe Sarrit mund të zhvillohen në Londër që në javën e ardhshme me kryetarin e Spurs, Daniel Levy, i cili është duke peshuar mundësitë e tij për vendin e nxehtë menaxherial.

Raportohet gjithashtu se Tottenham fillimisht ishte i interesuar për të punësuar Sarrin në verën e vitit 2018, kur ai u largua nga Napoli për të marrë detyrën në Stamford Bridge.

Sarri, 62 vjeç, thuhet se është i vetëdijshëm për interesin e Tottenham ndërsa ai mendon për një kthim në menaxhim pas pauzës. /Telegrafi/