Manchester United janë rikthyer te fitoret në Ligën Premier, pasi kanë mposhtur Norwich Cityn me rezultat 3-2.

Ka qenë një ndeshje ku Djajtë e Kuq kanë shkëlqyer falë paraqitjes së jashtëzakonshme të Cristiano Ronaldos që realizoi het-trick në këtë sfidë.

Vetëm pas shtatë minutave lojë, Ronaldo kaloi Djajtë e Kuq në epërsi pas golit të shënuar nga afërsia për 1-0 ku u asistua nga Elanga.

Në minutën e 32-të, Cristiano Ronaldo u përkujdes për ta dyfishuar epërsinë, ku realizoi me kokë pas asistimit nga Alex Telles.

Krejt në fund të pjesës së parë, Norwich ngushtoi epërsinë me golin e Dowell për 2-1.

Pjesa e dytë nisi shumë më mirë për mysafirët, kur në minutën e 52-të, Pukki realizoi për të barazuar rezultatin në 2-2.

Legjenda portugeze, Cristiano Ronaldo u përkujdes për fitoren e Djajve të Kuq duke realizuar një gol të mrekullueshëm në minutën e 76-të nga gjuajta e lirë për 3-2.

Deri në fund mysafirët tentuan të bënin diçka më shumë, por rezultati mbeti i pandryshuar.

United me këtë fitore  kalojnë në vendin e pestë me 54 pikë të grumbulluara, derisa Norwich City mbetet e fundit në tabelë me 21 pikë. /Telegrafi/