LAJMI I FUNDIT:

Regjimi kinez ka frikë nga ajo se çfarë mund të thonë programet sikurse ChatGPT

Regjimi kinez ka frikë nga ajo se çfarë mund të thonë programet sikurse ChatGPT

ChatGPT ka bërë mjaft bujë në Kinë: pothuajse çdo kompani e madhe e teknologjisë është e etur të zhvillojë chatbotin e saj të inteligjencës artificiale.

Baidu ka njoftuar planet për të lansuar chatbotin e vet diku muajin e ardhshëm. Ky obsesion rrjedh në përputhje me prioritetet strategjike të liderit kinez Xi Jinping për zhvillimin e AI-s – që daton të paktën në vitin 2017 – në garën e Kinës për t’u bërë lojtari dominues i AI-s në botë dhe përfundimisht një “superfuqi e shkencës dhe teknologjisë”.


Derisa zhvillimi i robotëve të Modeleve të Mëdha të Gjuhës apo LLM sikurse ChatGPT është vetëm një aspekt i së ardhmes së AI-s, LLM-të, siç tha një shkencëtar kryesor i AI-s së fundmi, “do të përcaktojnë inteligjencën artificiale”. Në të vërtetë, popullariteti i papritur i ChatGPT-s në Google ka “përmbysur punën e grupeve të shumta brenda kompanisë për t’iu përgjigjur kërcënimit që paraqet ChatGPT” – një tregues i qartë i rëndësisë së padiskutueshme të LLM-ve.

Megjithatë, aspiratat e Kinës për t’u bërë një superfuqi lider në botë e inteligjencës artificiale po i afrohen me shpejtësi një përplasje ballë për ballë me regjimin e saj të censurës. Partia Komuniste Kineze (PKK) i jep përparësi kontrollit të hapësirës së informacionit mbi inovacionin. Kjo mund të pengojë në mënyrë dramatike zhvillimin dhe përhapjen e LLM-ve, duke e lënë Kinën të gjejë veten një ritëm prapa Perëndimit në garën e AI-s, transmeton Telegrafi.

Sipas një raporti nga Nikkei Asia, rregullatorët kinezë kanë udhëzuar kompanitë kryesore të teknologjisë kineze që të mos ofrojnë shërbime të ChatGPT “mes alarmit në rritje në Pekin mbi përgjigjet e pacenzuruara të chatbot-it me AI-n për pyetjet e përdoruesve”. Një justifikim i përmendur, nga gazeta e sponsorizuar nga shteti China Daily, është se chatbotët e tillë “mund t’i japin një dorë ndihmë qeverisë së SHBA-së në përhapjen e dezinformatave dhe manipulimin e narrativave globale për interesat e saj gjeopolitike”.

Problemi themelor është se një pjesë e lirisë së shprehjes është e ndalur në Kinë, nëse në SHBA një chatbot krijon përmbajtje raciste ose kërcënon të ndjekë një përdorues atëherë konsiderohet problem, por në Kinë do të ishte problem nëse një chatbot thotë se Tajvani është vend i pavarur ose Sheshi Tiananmen ishte një masakër.

Por ta programosh një mjet sikurse ChatGPT në parim me Partinë Komuniste Kineze është mjaft e vështirë dhe ndoshta e pamundur. Sipas Yonadav Shavit, student Ph.D në Universitetin e Harvardit thotë se të bësh një chatbot të ndjekë rregullat në 90 për qind  të rasteve është mjaft e lehtë. Por ta bësh atë të ndjekë rregullat 99,99 për qind të rasteve është një problem i madh i pazgjidhur kërkimor. Outputi i këtyre programeve është i paparashikueshëm dhe ata mësojnë nga gjuha natyrore e prodhuar nga njerëzit, thotë eksperti. /Telegrafi/