Rashani i bindur: Do të jetë viti im, e dua përsëri titullin dhe Kupën në Norvegji

Elbasan Rashani ka kaluar lëndimin e pësuar javë më parë dhe është kthyer ai i vjetri në fushë.

Sulmuesi i talentuar nga Kosova së fundmi ka shënuar një gol të bukur në Kupën e Norvegjisë.

Anësori deportoi bukur në zonë nga krahu i djathtë dhe me një goditje të fortë mposhti portierin vendas.

Në një prononcim për Telegrafin, Rashani flet rreth formës së tij momentale te gjiganti norvegjez Rosenborgu.

“Aktualisht jam shumë mirë pasi kam kaluar lëndimin e pësuar javë më parë dhe jam rikthyer me gol në fushë”, deklaroi fillimisht Rashani për Telegrafin.

Vitin e kaluar Rosenborgu triumfoi në kampionat dhe do të luaj në kualifikimet për Ligën e Kampionëve.

Për Rashanin kjo është një mundësi shumë e mirë pasi do të fitojë përvojë edhe më të madhe.

“Çdo futbollist dëshiron të luaj në garat evropiane si Liga e Kampionëve ose Liga e Evropës. Jam i lumtur që do të luaj në kualifikimet e Ligës së Kampionëve pasi këto ndeshje do të më japin përvojë edhe më të madhe”.

“Synimi i klubit është të fitojmë disa ndeshje në kualifikime dhe të futemi në grupet e Ligës së Kampionëve ose në grupet e Ligës së Evropës”, vazhdoi Rashani.

Pasi ka vuajtur nga disa lëndime, Elbasani është i bindur se ky vit do të jetë më i miri për të.

“Jam i bindur se tani lëndimet kanë kaluar dhe nuk do të përsëritën më. Jam i gatshëm të jap më të mirën nga vetja për klubin dhe Përfaqësuesen”.

“Besoj që ky do të jetë viti im më i mirë në futbollin norvegjez duke shënuar gola dhe duke asistuar për ta ndihmuar klubin ta mbrojë titullin e kampionit”, tha Rashani.

Golashënuesi i dy golave me Kosovën beson se së shpejti do të luaj në një kampionat më të fortë evropian.

“Dëshira ime është të luaj në ligat kryesore evropiane por aktualisht jam pjesë e Rosenborgut dhe i lumtur këtu. Do të luaj në Evropë pastaj të shohim sa i përket të ardhmes”, deklaroi 23-vjeçari.

Rosemborgu është klubi i dytë në Norvegji për Rashanin i cili më parë luajti për Odd Ballklub.

Vushtrriasi ishte pjës edhe e futbollit danez ku për dy vite barti fanellën e Brondbyt. /Telegrafi/