Propozim radikal në Gjermani: Refugjatët të dërgohen në ishujt jashtë Evropës

Liderja e ekstremit të djathtë – Alternativa për Gjermaninë (AFD) – ka thënë se Berlini duhet që azilkërkuesit dhe emigrantët e paligjshëm t’i dërgojë jashtë Evropës dhe që Zyra për Refugjatët të bëhet Zyrë e Emigracionit.

Me fluksin e vitit të kaluar të mbi një milion emigrantëve që mësynë Gjermaninë, është rritur mbështetja në vend për AFD-në. Madje, pritet që kjo parti të ketë sukses në zgjedhjet që mbahen muajin e ardhshëm.

Frauke Petry e këtij subjekti, në një intervistë për ditoren Bild, ka thënë: “Emigrantët e paligjshëm dhe azilkërkuesit, aplikimet e të cilëve janë refuzuar, duhet të jenë të zhvendosen në dy ishuj jashtë Evropës – nën mbrojtjen e OKB-së”, transmeton Telegrafi.

Ajo nuk tregoi se për cilët ishuj e ka fjalën, por mediat gjermane mendojnë se fjalën e ka për ishujt Nauru dhe Manus, në Paqësor, ku Australia mban azilkërkuesit që zë në brigjet e saj.

“Zyra për Emigracion do të kujdeset që të gjithë emigrantët e paligjshëm ta lënë vendin sa më shpejt që të jetë e mundur”, shtoi Petry.

E njohur për fjalimet e zjarrta në mitingje, Petry në fillim të këtij viti ka shkaktuar reagime kur nga Policia gjermane ka kërkuar të përdorin armët e zjarrit kundër emigrantëve të paligjshëm.

Shumica e emigrantëve të cilët kanë shkuar në Gjermani gjatë vitit të kaluar, janë ata që kanë ikur nga lufta dhe persekutimit në Siri, në Afganistan dhe në Irak. /Telegrafi/