Prokuroria jep detaje për keqpërdoruesit e subvencioneve, paraburgim për shtatë prej tyre

Prokuroria Themelore Publike njofton se gjatë ditës së sotme ka realizuar aksion të koordinuar me MPB-në, për arresimin e disa nënpunësve shtetëror.

“Me aksionin e realizuar në Shkup, Tetovë, Gjevgjeli dhe Vallandovë, janë arrestuar 24 persona, kundër të cilëve është ngritur procedurë hetimore për ekzistimin e dyshimeve se kanë kryer veprën penale “keqpërdorim të detyrës zyrtare”. Me punën e tyre joligjore kanë dëmtuar buxhetin e Maqedonisë për rreth 220 mijë euro. Mes të dyshuarve janë 15 persona zyrtarë në Ministrinë e Bujqësisë dhe njësitë rajonale të kësaj ministrie, ndërsa personat tjerë janë persona fizik dhe persona juridik përgjegjës për prona private”, thuhet në njoftimin e Prokurorisë, përcjell Telegrafi Maqedoni.

Ata më tej shtojnë se personat dyshohen se në periudhën prej vitit 2011 deri 2016 kanë përdorur funksionin e tyre zyrtar dhe kanë shkelur të gjithë kufinjtë gjatë nënshkrimit të marrëveshjeve për blerje të tokave bujqësore.

Prokurori komptetent tek gjykatësi i procedurës paraprake në Gjykatën Themelore Shkupi 1, ka dorëzuar propozim për masën e paraburgimit kundër shtatë personave të dyshuar./Telegrafi/